GIPASABOT ni Mayor Oscar Moreno nga tumong ug tuyo sa mga gipasa nga mga executive order (EO) sama sa pagpatuman og curfew, pagsira sa mga malls ug bisan sa social distancing mao nga ang katawhan magpuyo sa balay.
Kini human nga duna pay mga dili gyud magpatoo niini nga mga pahimangno lakip na ang pagpatuman sa mando sa Department of Transportation (DOTr) nga social distancing alang sa kaayohan sa tanan ug aron mapakgang ang coronavirus disease (Covid-19).
Nasayran nga ang mga pampublikong sakyanan limitado lamang ug gani ang single nga motorsiklo wala na'y backride o angkas.
Gipasabot ni Moreno nga kining tanan dili ingon nga bawal ug dili aron mangdakop apan ang tumong niini nga dili mokuyanap pa ang virus sa dakbayan.
"Abi ninyo kanang ingon ana ang tuyo man gud para magpuyo sa balay, mao raman na, pananglitan emergency siyempre mosabot man ta," matud ni Moreno.
Gidugang pa nga pahimumdom kini sa tanan nga dili gyud kini ingon nga bawal gyud kini apan dili kini buhaton kay sayon matakdan sama sa pag-angkas kay wala'y social distancing ug sa mga pasaheroan nga dyip nga gilimitahan lang
"Pahinumdom kana sa katawhan, ang kontra nato dinhi ang virus di nato makita wa ta kahibalo og kinsa'y gadala ana so dali kaayo manakod," dugang ni Moreno.
Gibutyag usab niini nga dili tuyo ang pagpangdakop apan aron dili magkasakit ug dili makatakod.
Samtang nibutyag usab kini nga kini nga mga pahinumdom labi na sa Department of Health (DOH) tumanon lang tungod kay alang kini sa kaayohan sa tanan.
"Kung di na gyud mo motoo na bahala namo, ayaw nako'g basola," pahayag niini.
Nasayran nga ang nasapon nga nakalapas sa curfew ipapauli lang kini ug ang dili magpatuman og social distancing sa mga pampublikong sakyanan ang i-pakanaog.
Nagmando na usab si Moreno nga patas-an ang oras sa curfew diin magsugod sa alas 9:00 sa gabii hangtod alas 5:00 sa buntag ug gipahugtan ang pag-ban o pagdili sa pag-inom sa kadalanan ug gani dunay duha ka mga menor de edad ang nasapon nga nang-inom.