DEAR Noy Kulas,
Tawga lang ko sa ngalan nga Milay, 28 taga Cebu. Ang akong problema mao ang akong live-in partner nga grabe ka playboy.
Mga 3 years na mi nga nagpuyo. Duna siyay anak sa una niyang live-in partner nga ako ra sab nga giisip nga akong kaugalingong anak. Pinangga nako ang bata ug amiga ra mi sa mama. Maora gyud og duha ka mama ang inahan sa bata.
Pero naproblema ko kay karon, naay laing babaye nga napamabdusan siya ug mao pa ang magsige og pangaway. Wa kuno koy ayo kay tulo ka tuig na ming gapuyo pero wa ko kahatag og anak sa akong partner. Bisan unsa na lang ang iyang giestorya. Nasuko ko og maayo sa akong partner pero ingon niya di lang panumbalingon kay ingon ana kuno ang character labina kon mahubog.
Sakit ang gibuhat sa akong partner pero love kaayo nako siya. Sakto ra tingali nga di nako panumbalingon ang babaye? Please tambagi ko sa akong situation karon.
MILAY
Mil,
Kon maagwanta nimo ang kasakit nga nahitabo karon, pasagdahi na lang nang imong kapuyo nga bisan kinsa na lang nga babaye ang makigdug, apan wa ka magpabakana kay nahigugma ka niya. Sakit huna-hunaon nga wa siya uban nimo kay toa siya sa laing babaye nakig uban.
Daghan ang naa sa ingon niani nga relasyon, apan giagwanta ang psychological nga kasakit kay lagi nahigugma ug gugma ang gipasulabi. Mao na nga ang partner nanganad pud, gipasagdahan ang partner. Apan maayo ba kini in the long run? Di kini maayo alang nimo kay ang psychological nga pangabuso dunay di maayong epekto sa pagkatawo. Di pa nimo ni mamatngunan kay hinayhinay ning mokutkot sa imong pagkatawo. Adto ni mo-manifest sa ubang mga aspeto sa imong kinabuhi. Ang malata og maayo ani mao ang imong self-esteem nga ubos kaayo.
Busa, huna-hunaag maayo kon maayo bang magpabilin ka sa mao nga relasyon tali sa tawo nga way respeto nimo tungod kay di niya igsapayan unsa ang iyang feeling. Unaha paghigugma ang imong kaugalingon una pa ang uban.
NOY KULAS