MAAYO pa kadtong Land Transportation Office (LTO) Department Order 2008 nga naglatid sa multahan sa kalapasan. Gideklarar sa RTC-Baguio nga wala mahisubay sa balaod maong gihulipan sa Joint Administrative Order (JAO) 2014 nga nagpahamtang na hinuon og dagkong multa. Maong ilegal kadtong executive order nga mo-impound sa mo-counterflow kay nakasapaw sa JAO, Republic Act 4136 ug City Ordinance 801.
Ang traffic enforcers dili makaimbargo og lisensya igo lang makaisyo og citation ticket kay iya sa LTO ang maong kaakohan ingon man dili makainbestigar og vehicular accident kay iya lamang sa kapolisan.
Ang JAO nakasugat og kusganong pagsupak nila Greg Perez sa Piston, Ryan Benjamin Yu sa Citrasco, Richard Cabucos sa Metro Taxi, Romeo Armamento sa Confederation of Transportworkers, Rudy Laconza sa Atomic ug Julie Flores sa Bus Operators. Apan bungol ang Department of Transportation (DOTr), (LTO ug Land Transportation Franchising and Regulatory Board (LTFRB) kay wala manumbaling sa mga reklamo.
Posibilidad nga mangwarta ang traffic enforcers sanglit sekretong motunol ang mga drayber kaysa pag-om-om sa dakong multahan. Bulilyaso ang serbisyo sa LTO sama sa kalangay sa plaka ug plastik nga lisensya, wala makakontrolar sa fixers, haguka ang kampanya batok kolurom, wala makasumpo sa anti-smoke belching, walay maayong sistema kay pwerting taasa sa linya sa mga aplikante, reklamo nga mangayog dakong kantidad sa pasalig nga makapasar sa written ug practical exams. Kuti nga 15 ka oras nga thoeritical driving course sa mokuha og student permit nga magsugod sa Abril 2020.
Makadasig kadtong kamandoan ni LTO Chief Virginia Torres sa 2013 nga wala nay drug test sa molukat og lisensya subay sa Anti-Drunk ang Drugged Driving Law (RA 10586) ni Sen. Tito Sotto nga ipaagi na sa random o kinalit nga drug test. Apan si RTC-Toledo Presiding Judge Hermes Montero mihukom nga ibalik. Mga batid sa balaod miingon nga walay katungod ang korte sa pagpabalik sa drug test kondili ang kongreso ra. Makalilibog kay dinhi ra sa Cebu ang dunay drug test samtang wa na sa ubang rehiyon. Tataw nga dunay sabotahe.
Makadasig sab ang Pantawid Pasada Cash Card nga giproseso sa Land Bank. Giapud-apod sa DOTr ug LTFRB ang maong fuel subsidy P5,000 sa 2018 nga himuon nang P20,000. Nakapahimulos niini ang 179,852 ka mga legitimate franchise holders sa nasod. Ipatubil sa mga drayber pinaagi sa Point of Sale devices sa gasoline stations agig tabang. (csa_1156@yahoo.com)