SUKAD niadtong Huwebes, Marso 26, ug hangtod karon, Sabado, Marso 28, nagpadayon ang kabalaka hinungdan sa kaguliyang sa publiko bahin sa nagpusotpusot nga executive orders (EO) sa nagkalainlaing local govenrment units (LGUs) nga nagdeklarar sa tibuok lalawigan ug mga dakbayan sa Sugbo nga ipaubos sa Enhanced Community Quarantine (ECQ).
Sama sa lockdown na ang tibuok isla sa Sugbo human gidid-an na ang pribado ug publikong transportasyon ug pagpasira sa mga establisemento o trabahoan. Imbes namingaw na unta ang kadalanan, kalit nanggawas ang katawhan ug nag-unang rumbo mao ang grocery stores, nag-panic buying.
Wala matuhog o nanagana lang kaha tungod sa EOs, bisan dunay espisyal nga konsiderasyon o exemption sa pipila ka gikinahanglang serbisyo sama sa medikal, parmasiya, groceries, gas stations ug uban pa.
Makalibog ang EOs human naglahilahi ang pagsugod sa ilang ECQ. Ang dakbayan sa Sugbo magsugod karong udto, Marso 28. Ang dakbayan sa Mandaue ug Lapu-Lapu karong Dominggo, Marso 29. Ang lalawigan sa Sugbo magsugod sa Lunes, Marso 30, uban sa dakbayan sa Talisay ug uban pa.
Si Gobernador Gwendolyn Garcia maoy unang nisulti bahin sa ECQ nga medyo duol na sa lockdown ug sama sa wala masabti pag-ayo ang exemptions hnungdan sa pag-panic sa mga tawo sa pagpamalit sa nag-unang panginahanglanon o kaha, naneguro lang dunay makaon.
Apan alang sa mga kabus, matod sa panultion sa kanto, “Nag-panic lang pero way buying.” Ang naasoy nga hut-ong maoy unang maapektohan sa ECQ. Dunay gikataho nga rasyon nga pagkaon gikan sa kagamhanan apan tan-awon lang nato kini kon masigo o molahutay ba sulod sa usa ka buwan.
Ang kaguliyang ug kabalaka dili kaha moresulta sa kasamok? Simbako, ipalayo. Lisod na. Dugang problema. Kalma lang kita. Dili mag-panic. Labaw sa tanan, mag-ampo.