TUNGOD sa gipatuman karon sa kadagkuan sa Bureau of Jail Management and Penology (BJMP) 7 nga No Dalaw Policy, nagnihit na ang shabu sa prisohan.Si JO2 Bart Reasol, chief investigator sa Cebu City Jail (CCJ), niingon nga naobserbahan sa ilang warden ug mismo jail officers sa matag selda sa maong pasilidad nga walay shabu na nga nakasulod.
Matod ni Reasol nga bisan unsa pa ka istrikto ang ilang gipatuman sa pasilidad sa nang labay nga mga semana, duna gihapoy misuway nga mopasulod niini, apan masakpan gihapon sila tungod sa mga gipanggamit nga mga kahimanan aron pagsuta kon ang dalaw duna bay dala nga kontrabado.
Tungod sa krisis sa Covid-19 nasud, gipatuman usab sa BJMP-7 ang No Dalaw Policy ug wala pay tukma nga adlaw kon anus-a mobalik ang normal nga pagdalaw.
Tungod niini, nabantayan sa CCJ nga bisan paman sa gipatuman nga direktiba duna gihapon misuway sa pagpalusot og shabu sa CCJ pinaagi sa paglabay sa maong kontrabando, nga ipaagi sa likod sa maong edipisyo ngadto na sa masugoan sa usa ka piniriso sanglit nga hangtod karon ila pang giila kon kinsa.
Apan sa maong mga sekreto nga paglabay og kontrabando sa likod nga bahin, wala molampos ang human nasakpan gihapon tungod kay didto mitugdong ang gipanglabay nga kontrabando sa kaubanang jail officers. Martes, Marso 24, tulo ka medium pack nga shabu ang ilang na imbargo human sa ila nipaingon ang mga kontrabando nga pinutos sa newspaper.
Samtang, laing duha na sab ka bulto sa shabu ang gilabay niadtong Huwebes sa hapon, Marso 26, nga mipaingon lang gihapon ang hagbong sa jail officers.
Dugang ni Reasol nga wala pa nila masuta kon kinsa kining mga tawhana ang tiglabay og kontrabando sa luyo sa building tungod kay sa pagsusi sa taga BJMP wala nay naabtan nga tao sa dapit.
Ang ilang warden nagpadayon sa pagsuta kon kinsa kining hatagan nila og leksyon.
Anaa sa P170,000 ang balor sa shabu nga nasakmit sa duha ka higayon nga pagsuway ug pag labay niini pasulod sa maong pasilidad.
Pahimangno sa BJMP-7 sa buot mosuway og pagpayuhot nga mas maayo nga dili na lang mobuhat tungod sa mas hugot nga silot.
Samtang, moabot usab sa P2 milyones ang kantidad nga shabu ang nasakmit sa lahi nga pagpangdakop sa Sityo Tulay, Barangay Calajoan sa lungsod sa Minglanilla.
Ang mga operatiba sa Provincial Intelligence Branch (PIIB) ug drug unit sa Cebu Citu Polic Office (CPPO) pinangulohan ni PLt Col. Marlu Conag, pangulo sa PIB, maoy mironda kagahapon, Biyernes sa buntag. Marso 27.
Nadakpan sila si Jasmine Parajes, 43, gikonsiderar nga high value target, lakip ni Lucky June Ibon, 37, taga Barangay Guadalupe; Ruby Macaraya, 34, ug molupyo sa Barangay Tangke, siyudad sa Talisay.
Mokabat sa P2.1 milyones nga balor sa shabu ang nasakmit gikan sa mga dinakpan. (BBT)