TALIWALA ning kahigpit nga sitwasyon karon, padayon gihapon ang pagpakondisyon ni Rey Suerte ug ingon man sa iyang mga kauban sa Gilas Pilipinas.
Kini bisan pa man og wala nay praktis ang kinatibuk-ang puwersa sa team human gipasunod didto sa Kaulohan ang lockdown.
Matod sa produkto sa University of the Visayas (UV) Green Lancers nga sa wala pa i-implementar ang lockdown, nananghid siya sa management nga mouli sa ilaha kay aduna siyay award nga dawaton gikan sa ilang province.
"Nananghid nako daan wala pa nila gi suspended nga muuli ko dri amoa kay naay giaward ang province dri sa amoa para nako," nagkanayon si Suerte, lumad nga taga Monkayo, Cagayan Valley sa Davao de Oro.
Pipila lang ka adlaw gikan sa iyang paghiuli, giimplementar dayon didto sa Kaulohan ang lockdown.
Gipangsirhan ang mga gym, gidid-an na usab ang tanang teams sa pagpahigayon og ensayo. Wala na usab tugti ang mga players sa paggawas-gawas sa ilang mga pinuy-anan.
Apan bisan pa niini, matod ni Suerte, nga gimandoan gihapon sila sa pagpahigayon og kinakaugalingon nga pag-ensayo.
Ang management sa Gilas mihatag kanila og programa nga maoy ilang sundon. Gawas niini, kinahanglan kini nilang i-video aron ipadala ngadto sa ilang coach aron pagmatuod nga ilang gisunod ang mando.
"Last practice namo sa Gilas March 10 then suddenly gi suspend tungod sa mga panghitabo karon, nya karon gihatagan mi ug workout program ni Coach Tab na pirme namo buhaton bisan naa lang mi sulod sa balay. Nya kinahanglan namo kuhaan ug video among kaugalingon para mapakita namo sa management nga nag trabaho jud mi," dugang ni Suerte, ang overall no. 2 pick sa Blackwater Elite sa niaging PBA drafting.
Isip no. 1 pick, ang two-time Cesafi MVP otomatikong masakop sa training pool sa Gilas Pilipinas.
Sa kasamtangang lineup sa Gilas nga ubos sa pagdumala ni interim coach Mark Dickel, si Suerte anaa sa reserved list. (JBM)