MANAGSUON sikop sa entrapment operation nga gilusad sa kapulisan tungod sa overpricing sa pagpamaligya og ethyl alcohol nga mas taas sa suggested retail price (SRP).
Ang mga sakop sa Criminal Investigation Detective Group (CIDG) 7, Provincial Team nga gipangulohan ni PLtCol. Aladdin Dingal, uban sa Regional Anti-Crime Unit (Racu) 7 ug mga sakop sa Food and Drug
Administration (FDA) 7 milusad ug usa ka entrapment operation sa dan Cabreros, Barangay Basak San Nicolas, Cebu City.
Nasikop ang managsuon kini subay sa pagpamaligya sa kinarton nga ethyl alcohol nga tag 500 ml matag botelya ngadto na sa P170 matag usa ka botelya sukwahi sa SRP nga ginapamaligya sa supermarket.
Giila ni PLtcol.Aladdih Dingal ang mga dinakpan nga sila Jhon Amorio, 28, ug si Jezrel Amorio 32, pulos mga maniniyot ug lumad nga taga Barangay Babag, dakbayan sa Lapu-Lapu.
Apan kining duha sa Barangay Basak San Nicolas nanangadakpan sa ilang giabangan nga panimalay sa dan Cabreros.
Si Dingal nga nahinabi sa Superbalita Cebu niingon nga pinaagi sa online ang ilang pag-order hinungdan nga kuyog ang mga sakop sa Racu-7 sa maong operasyon.
Ang mga sakop sa FDA nga kuyog sa pagpangronda niingon nga halos moabot na sa triple ang presyo nga gipatong sa matag 500 ml nga botelya sanglit kon kini paliton sa merkado anaa ra sa P61.50 ang matag usa.
Kon basehan ang pinakaubos nga presyo sa supermarket ang P61.50 nga presyo maoy kinabaratohan. Atol sa operation nasakmit sa managsuon ang lima nalang ka karton sa ethyl alcohol sanglit nga mao nalang daw ang nahabilin nga stocks nga gihuptan sa duha.
Ang mga dinakpan mag atubang ug kaso nga kalapasan sa Republic Act 7581 ug RA 9711 subay sa Presidential Proclamation Order 922.
Ang Superbalita Cebu buot unta kuhaan ang duha sa ilang habig kalabot na sa pagpamaligya ug overpricing apan nagdumili na sa pagpagawas sa ilang pamahayag. (BBT)