DUNGAN sa pag-epekto sa enhanced community quarantine (ECQ), ang Cebu City Government magsugod na usab og paghatag sa labing minos 250,000 ka quarantine pass (QP) sa tagsa-tagsa ka mga balay sa tibuok dakbayan.
Si Mayor Edgardo Labella nipahibawo nga house-to-house ang distribution sa QP nga gamiton sa nagpuyo sa balay para makagawas ug makapalit sa paliton nga di sitahon sa otoridad.
Sugod Abril 1, ang Philippine National Police, military ug force multipliers moestrikto sa pagpatuman sa QP diin matag balay, adunay gitugotan nga makagawas ang usa hangtod sa Abril 28 gumikan sa ECQ aron mapugngan ang pagkatap sa coronavirus disease (Covid-19).
Si Konsehal Raymond Garcia, majority floor leader sa konseho, nagkanayon nga samtang wa pa makumpleto ang QP gikan sa City Government, ang QP nga giisyu sa barangay magamit, apan kadtong barangay nga way QP, mahimo gihapon nga makagawas ang mga sakop sa pamilya pinaagi sa pagdala og identification (ID) card. Ang QP adunay upat ka mga klase.
Una, ang green QP nga alang sa mga molupyo sa siyudad; red QP para sa trabahante sa gobyerno; blue QP para sa mga di residente sa siyudad ug white QP para sa crisis management teams ug frontliners.
Base sa Executive Order No. 65 ni Labella, ang gustong mokuha sa red, blue ug white QP kinahanglan nga mo-submit og personal ug letter-request ngadto sa Office of the Mayor o mopadala sa e-mail address sa ccg.ecqpass@gmail.com .
Ang letter-request kinahanglan adunay ngalan, function sa gobyerno (red), siyudad diin sila nagpuyo (blue), opisina o kompaniya diin sila nagagikan (white) sa tawo ug iyang trabaho sa gobyerno nga gialagaran diin ang Office of the Mayor maoy mo-validate sa ilang aplikasyon sa di pa sila isyuhan og ECQ pass.
Apan ang stay at home order subay sa EO No. 064, Series of 2020, ilawom sa Section 2.A. way labot ang mga medical practitioner, officers, hospital staff, nurses, ug health volunteers, kinsa nagpahigayon og medical assistance.
Emergency personnel, tanang authorized national ug local government officials and employees, drivers and personnel sa delivery vehicles of all types of cargoes, construction workers nga gitugotan sa City Government.
Ang accredited media personnel, mag-uuma, mangingisda ug agri-business personnel, tawo nga gustong magpatambal sa ospital kuyog sa usa ka kauban, empleyado sa mga exempted nga balay patigayon ug mga tawo nga gitugotan sa mayor o iyang representative.
Ang maong mga tawo nga ginganlan ilawom sa EO No. 064, di na kinahanglan nga mokuha og ECQ passes ug kon sitahon sila sa pulis o awtoridad, ipakita lang ang ilang mga ID.
Sugod karong alas 12:01 sa udto, moepekto na ang ECQ ilawom sa EO No. 064 ni Labella apan ang mayor niingon nga dili angay mag-panic ang mga tawo sanglit abli gihapon ang mga groceries, convenient stores, gasoline stations ug uban pang establisemento nga nagtunol sa batakang panginahanglan panahon sa ECQ.
Ang City Government aduna say gitagana nga 40 ka mga bus, 20 ka vans para sa transportasyon sa mga frontline personnel ug mga tawo nga gustong mosakay og libre gumikan sa paghunong sa public ug private transportation.
Mga pulis mobantay
Sugod karong alas 12 sa udto, Marso 28, sirhan sa Cebu City Police Office ang borders sa Dakbayan sa Sugbo.
Wa nay makasulod nga di mga residente sa dakbayan isip kabahin sa pagpatuman sa ECQ nga giluwatan ni Labella.
Matod ni Cebu City Police Office officer-in-charge Colonel Hector Grijaldo nga wa nay publikong sakyanan nga makabiyahe sa siyudad sa Sugbo.
Apan kon adunay taga dakbayan sa Sugbo nga gikan sa mga silingang dakbayan nga ipaubos sa proseso ug pangayoan og mga dokumento aron makasulod sila sa Cebu City.
“Ang atong katawhan diri sa Cebu City ug namuyo diri sa Cebu City, nanarbaho diri sa Cebu City authorized sila nga mosulod ug mogawas. Kon naa didto ang ilang pinuy-anan sa laing lugar, kinahanglan lang nila og clearance,” dugang sa pagpasabot ni Grijaldo.
Pagpasabot ni Grijaldo nga ihunong lang una ang pagpasulod sa mga sakyanan lakip na ang mga tawo sa dakbayan sa Sugbo gikan sa mga silingang lungsod ug siyudad.
Kon masuta nga hawan na ang tibuok siyudad ug wa nay mga tawo nga mogawas sa kinapusoran sa dakbayan, dinhi na subling ablihan ang borders.
Si Police Brigadier General Albert Ignatius Ferro, hepe sa Police Regional Office 7, niawhag sa mga barangay official nga gamiton ang ilang mga sakyanan kon adunay emerhensya sama sa mga residente nga moadto sa tambalanan ug mga klinika.
Gidili
Sugod sa Marso 30, 2020 gidid-an na sa pagsulod, gawas ang tanan nga mga Sugboanon nga way importante nga trabaho sa dakbayan sa Sugbo.
Kini maoy gipahibawo ni Gobernador Gwendolyn Garcia sa mga tigbalita gahapon.
“Buot na nako nga ipasabot sa tanan nga ako naka desider isip gobernador tungod niining padayon nga pagsaka sa mga kaso either positibo or presumptive positive dinhi sa dakbayan sa Sugbo sugod lunes alas 12:01 sa adlaw nga lunes dili na nato tugtan ang pag sulod pa sa dakbayan sa Sugbo gikan sa uban nga mga dakbayan ug lungsod kalungsoran sa lalawigan sa Sugbo”, matod ni Garcia.
Nagpatuman sugod karong alas 12 sa udto, Marso 28, ang Dakbayan sa Sugbo sa ECQ.
Way labot niini ang mga frontliner sama sa mga doktor, nurse, medical ug rescue personnel, ug uban pang batakang mga serbisyo, apil na mga tigbalita. (PAC, AYB, ANV)