SUPERBALITA DAVAO

Talento: The virus

Panglantaw



MAAYONG adlaw! Kadaghanan sa atong mga kaigsuonan karon nangalisang tungod aning coronavirus disease (Covid-19). Sa tibuok kalibutan, padayong nadugangan ang ihap sa mga natakdan ug ang nangamatay. Naay nangaayo sa sakit apan mas taas ang ningpanaw.

Dili ni “sour-graping” ha pero think about it, tungod sa Covid-19... naa kay bag-ong sakyanan pero dili ka kalaag-laag, nakabayad naka sa bonggang bakasyon karong summer apan “tanggong” kay kanselado tanang laag, migo.

Brayt ug successful kaayo sa pagpanarbaho apan dili na kadiskarte kay community quarantine pa lagi, ug uban pang mga sitwasyon nga daw lahi sa naandan nato, igsuon.

Si Anna Potz nga akong higala, ningtikig na ang liog sa sobrang tinulog. Mauso na pod seguro ang chubby nga sexy kay habhab man pod ang trip sa kadaghanan. Imo, unsa man?

Seriously, daghan kanato ang nag alingasa kay lagi dili komportable sa mga kabag-ohan nga dinala sa Covid-19, pare. Tanan kita naga “adjust” kay gusto pa natong mabuhi ning kalibutan.

Ambot lang pod ning uban nga simpleng hangyo sa gobyerno nga mag social distancing, self ug community quarantine, dili tumanon! O magutman ta kay way pangwarta apan anaay gobyernong moayuda, paabot sa gamay bah (unta dili ugumon sa uban).

Gikan ko sa palengke kagahapon, nagdutdot gihapon ang katawhan sa isdaan ug ubang kadalanan. Maayo’g ipalapad, kay Madam S__ apil tong senador nga ninglapas sa quarantine protocols. Kamo na lay imagine kung kinsa siya kay nakagawas na baya ha ha!

PERO WAIT... tanan ba nga atong ginaagian karon “dautan?” Tan-awon daw nato sa pikas bahin kung aduna bay nindot nga resulta ning Covid-19.

Aduna koy lista, ikaw na lang dungag dinha higala. Una, tungod sa maong virus, nagpuyo na sa mga kabalayan ang daghang latagaw nga tawo kaniadto. Ang mga uwagong bana, kulong maong si misis nay lambingon, karon. Ginatutokan na pod nato ang pagpanghinlo dili lamang sa palibot apan mas importante sa kalawasan aron dili matakbuyag mga sakit.

Taas-taas na pod ang oras nato sa atong pamilya ug nakahigayong manahi o gantsilyo nga kalingawan kaniadto. Na-repair na pod ang mga kural ug kaatopan apil pa ang tiil sa katri napahugtan. Labing-labing ug tiktok pod ang tirada sa uban.

Nakapananom na pod og mga utan aron depensa kung ang mga tindang pagkaon sa merkado, mahutdan. Matud sa pulisya, “crime rate” ningbaba! Dili man basta makaatraka ang mga kawatan kay naa may tawo ang mga kabalayan.

Tuod, daghang padulong na nga mapasmo apan sa kalisod karong higayona, dili pa tungod niana nakabalik kita’g luhod ug pangamuyo sa Ginoo?

Sa Bibliya, daghang mga pagtulun-an nga susama sa atong ginaagian. Tuod, ang mga kalisod kaniadto, natapos ra man. Ayaw lang kaayo kabalaka kay “walay forever,” miga. Mahuman ra lagi ni busa mag-cooperate kita, mare.

Ang Salmo 62 nagkanayon, “Ang akong kalag nakakaplag pahulay sa Dios ra; ang akong kaluwasan nagagikan Kaniya. Siya lamang ang akong bato ug ang akong kaluwasan; Siya ang akong kalig-on, dili ako matarug.”

Sama ninyo, ningbati pod akog kahadlok, migo apan mapasalamaton nga nagalahutay pa kay anaa ang Dios, higala. Dili Niya kita pasagdan kay Siya man ang atong dalangpanan. Ampo ug mosunod lang kita sa mando alang sa atong kaayohan, AMEN?

Si Job sa iyang mga pag-antos nagkanayog, “The Lord giveth; the Lord taketh away. Blessed be the name of the Lord!” Ang Dios mao ang naghatag ug Siya pod ang magakuha niini. Bulahan ang nagalan sa Ginoo.

Ang ampalaya tuod pait apan makapahimsog sa atong kalawasan. Ang mga pagsulay pait usab apan makapalig-on sa atong relasyon sa Ginoo.

Pwede ra diay kaayo kitang mahanaw anytime dinhi sa kalibutan sa Covid-19 o bisan unsang pamaagi sa Kahitas-an. Andam na kaha kita sa atong padulnganan? Hinuktuki samtang aduna pay panahon, igsuon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph