DAVAO DEL NORTE -- Hingpit nang natuldokan ang mga nikatag nga istorya, dili lang sa social media, apil na sab sa nagkadaiyang suok sa siyudad sa Tagum human nagpagawas og katin-awan ang hingtungdang barangay kapitan kinsa giingong nagpositibo sa coronavirus disease (Covid-19).
Si kapitan Bryan Kim Samuel Lee Angoy sa Barangay Apokon sa nahisgutang siyudad, mapaubsanong nangayo’g dispensa sa katawhan human miguwa ang inisyal nga resulta sa laboratory test gikan sa Southern Philippine Medical Center (SPMC) nga nagpositibo siya sa Covid-19.
Apan sa protocol sa Department of Health (DOH), gikinahanglan pa nga ipadala ang resulta ngadto sa Research Institute For Tropical Medicine (RITM) sa kaulohan aron nga makompirma gyud kung positibo ba siya niini.
Si Angoy, kasamtangang naka-confine sa Davao Regional Medical Center sa Tagum, giingong naa sa maayong kahimtang ug padayon nga nagpaalim.
Gibutyag sa kapitan nga ang tanan niyang aktibidadis, iya nang gisulti ngadto sa Covid-19 monitoring team sa Tagum.
Samtang ang tibuok niyang pamilya kasamtangan na usab nga naka-quarantine.
Giklaro sa kapitan nga sukad niadtong Marso 14 , atua lamang siya sa sulod sa ilang balay, luyo sa padayong pag-serbisyo sa katawhan sa barangay sa dihang gideklara ni Presidente Rodrigo Duterte ang quarantine sa kaulohang Manila ug hugot nga ipatuman ang social distancing.
Gisulti ni Angoy nga wala siya misupak sa mando nga quarantine tungod sa pag-adto niya sa Matina New Gallera sa siyudad sa Davao niadtong Marso 10 ug 12, apan Marso 13 na nagpaguwa og mando nga ang tanang mitambong sa Philippine Councilors League (PCL) event niadtong Pebrero 26–28, 2020 angay nga mag-quarantine.
Dominggo, Marso 22, gihilantan suma pa pa si Angoy ug subay sa protocol, gipahibalo gilayon niini si Mayor Allan Rellon ingon man ang City Health Office kinsa maoy pangulo sa Covid-19 Team sa siyudad.
Sumala pa nga base sa assessment, lampas na siya sa 14-day quarantine period kung ang basehan ang iyang pag-uli gikan sa Manila niadtong Pebrero 28 hinungdan nga siya gi-refer sa pribadong ospital sa siyudad ug na-admit alas 8 sa gabii, Marso 22.
Apan pagka-alas 10 sa gabii sa samang adlaw, miabot ang balita nga nagmando sa tanang nakaadto sa Matina New Gallera niadtong Marso 10 ug Marso 12 kinahanglan nga mag–quarantine.
Hinungdan nga gitawgan gilayon sa pamilyang Angoy ang CHO sa Tagum ug gilayong gibalhin siya ngadto sa Davao Regional Medical Center.
Samtang ang higala ni Angoy nga si Pat Lucero Paquiao, nagklaro nga sa pagkakaron ang kapitan anaa na sa stable nga kahimtang ug wala nay gibating kalintura, ubo o maskin unsang sintomas sa Covid-19.
Dugang ni Pacquiao nga buot ipaabot sa pamilyang Angoy nga dili angay kabalak-an sa katawhan ang nahitabo sa kapitan sanglit sila nga iyang pamilya managlahi og gipuy-an ug wa sab silay gipamating sakit nga maingong sintomas sa Covid-19. (Dexter T. Visitacion)