GIREKLAMO sa ubang molupyo sa lungsod sa Bansalan, Davao del Sur ang pag-apud-apod sa mga quarantine pass (QP) sanglit daghan ang wa makadawat samtang ang uban gipabayad sa ilang purok lider og membership fee nga P130.
Gumikan niini, gimando ni Mayor Quilin Sarte sa tanang kapitan sa barangay nga dili lisud-lisuron ang mga molupyo nga makaangkon og QP sanglit libre lang kini nga makuha gikan sa mga purok lider.
Nasayran nga gitunong sab ang pagpaningil sa mga amutan sa ilang purok mao nga dili hatagan og QP kon di makabayad.
Aduna say pipila ka molupyo sa Barangay New Clarin sa lungsod ang mialma sanglit sila pa ang paadtuon sa barangay hall aron mokuha og QP.
Apan sumala sa mayor sa lungsod, kinahanglan nga ipalahi una ang ubang obligasiyones aron makabaton og QP ang matag representante sa matag pamilya sa 25 ka mga barangay.
Gikural na sab ang palibot sa merkado publiko sa lungsod mao nga dili makapamalit kon way QP ug angayan nga motamak sa kwarentinas nga gibutang sa entradang bahin sa lugar.
Samtang mga trak nga nagkarga og gulay padung sa laing lugar, obligado nga mokuha og “Food Lane Vehicle Pass” gikan sa Office of the Provincial Agriculturist (OPAG) sa kanto sa dalang Lim ug Bataan sa Barangay Zone 3 sa dakbayan sa Digos. (Orlando B. Dinoy)