SI DAVAO City Police Office (DCPO) director Colonel Kirby John Kraft nagsulti nga sugdan na nila og implementar ang “No Back-ride Policy” sa mga motorsiklo ning higayon sa coronavirus disease (Covid-19) pandemic bisan pa og nagsul-ob sila og mga himan nga pangprotekta sa kagaw.
“This is in compliance to strictly enforce physical distancing. If we allow back ride then we are violating physical distancing. This is a crucial time in controlling the Covid-19 virus or all our efforts in quarantine will be futile,” tin-aw ni Kraft.
Sayo niini, si Davao City Mayor Sara Duterte-Carpio nagtugot sa angkas basta lang nga nagsul-ob sila og panagang sama sa tabon sa nawong ug kapamilya o paryente lang. Apan Biyernes, gitin-aw ni Kraft ngadto sa SunStar Davao nga mga angkas di na tugtan sa siyudad sa paningkamot nga mapakgang na ang pagtapon sa kagaw.
Dugang ni Kraft nga ila nang gisugdan ang pag-implementa sa polisiya niadtong Huwebes, Marso 26.
Mga badlungon nga motorista silutan tungod sa paglapas sa Section 9 RA 11332 o ang Mandatory Reporting of Notifiable Diseases and Health Events of Public Health Concern Act tungod kay wa makig-alayon sa implementasyon sa quarantine.
Ug mga masinupakon mahimo sab nga pasakaan og kaso sa pagsupak sa article 151 sa Revised Penal Code o disobedience to person in authority.
Samtang giawhag ni Kraft ang publiko nga makigkoordinar sa mga sumbanan nga gitumong sa kaayohan sa tanan taliwala sa seryusong krisis sa panglawas.
Apan ang bag-ong polisiya nakahatag og daghang pangutana ug kalibog ngadto sa publiko.
Usa ka tiggamit og Facebook sa pangalan nga Zayros, nangayo og basihan sa polisiya. Kay naghatag lang kanila kini og risgo kay mapugos sila og sakay sa pampublikong behikulo nga wala mag-implementar og social distancing.
“Please provide implementing rules and regulations about this matter. Kay mostly sa backride kai family members lang. If you think that we are violating the social distancing rule. Then you are violating our right to protect ourselves from people we don’t know by riding public transportation. If our jobs don’t allow us to work, we won’t compromise already. Hence our job required us to go to work amid crisis,” tin-aw niya.
Ang Department of Health (DOH) Davao nagtaho nga sukad 9 sa buntag sa Marso 27, duna na silay kinatibuk-ang 78 ka patients under investigation na-admit tungod sa makatakod nga sakit sa duha ka mga ospital nga gipadagan sa gobyerno sa rehiyon samtang ang positibo nga pasyente nagpabilin sa 6.