GIBUTANGAN gayod karon sa Davao City Police Office (DCPO) og ngipon ang balaud ubos sa Section 9 sa Republic Act (RA) 11332 o ang Mandatory Reporting of Notifiable Diseases and Health Events of Public Health Concern Act, isip pakig-alayon sa implementasyon sa community quarantine ning siyudad.
Gimando ni DCPO director Colonel Kirby John Kraft nga ipatuman ang “No Back-ride Policy” sa mga motorsiklo ning panahon sa Coronavirus Disease (Covid-19) pandemic bisan pa og nagsul-ob sila og mga himan nga pangprotekta sa kagaw.
Nakita sa kapulisan nga nakasupak ang katawhan sa RA 11332 gumikan wala na napatuman niini ang social distancing nga mao unta ang usa sa mga butang nga malikay sa makamatay nga virus.
“This is in compliance to strictly enforce physical distancing. If we allow back ride then we are violating physical distancing. This is a crucial time in controlling the Covid-19 virus or all our efforts in quarantine will be futile,” pagpaklaro sa City director.
Nawad-an na og bili ang unang gibutyag ni Davao City Mayor Sara Duterte-Carpio nga puwede ang angkas apan kadto lamang mga miyembro sa pamilya ug kinahanglan nakasuot og mga panagang sama sa face mask.
Sa mga checkpoint nga gimuntar sa kapulisan, masanta na ang mga malapason, ug dunay uban, makita gani ang checkpoint, namalik sa agi, gibalik ang angkas sa gigikanan, butang nga makita diha ang paghatag og ngipon sa balaud.
Ang mga masinupakon pasakaan og kaso sa pagsupak sa Article 151 sa Revised Penal Code o disobedience to person in authority, ug diha gyo’y mga nasampulan niadtong Huwebes, Marso 26, 2020 sa pagsugod sa implementasyon.
Kung magginahi gayod og ulo... na, hayan mapasakaan gayod og kaso. Ang gihimo karon sa awtoridad kaayohan sa katawhan, busa motuman kita sa gipatuman sa kagamhanan.
Seryusohon pod unta ni sa kapulisan, kana bang, makanunayon, basin unya taman lang kini sa permiro, basin unya maluya na pag-abot sa unahan kay lagi madala lang sa hilot sa pangatarungan sa mga nagmaneho og motorsiklo.
Apan sa pamunoan karon sa DCPO, nakasegurado ang publiko nga seryuso sila sa pagpatuman niini, nunot sa kabalaka ug kahadlok sa katawhan ning makamatay nga virus.