GIBUTYAG ni Senator Manny Pacquiao nga negatibo siya sa coronavirus disease (Covid-19) apan nagpabiling gipaubos sa home quarantine human sa iyang pagpakighimamat sa laing senador nga si Koko Pimentel, kinsa nasuta nga positibo sa makalilisang nga virus.
Matod ni Pacquiao, 41, nga nagpaubos na siya sa home quarantine sukad nga nitambong siya sa special session sa Senado niadtong Marso 23, 2020.
Gawas sa medical test, negatibo sab si Pacquiao sa Rapid Testing Kit nga gihatag sa iyang kahigalaan gikan sa South Korea.
“Huwag po kayong mag-alala. Gamit ang rapid testing kit na approved sa Korea, ako po ay nag-negatibo. Hindi pa approved ng FDA dito, pero yan po ang ginagamit sa Korea,” pamahayag ni Pacquiao sa usa ka mensahe nga gipagawas sa iyang media liason nga si Aquiles Zonio ug napatik kini sa www.spin.ph.
Aduna sab ang nag-awhag kang Pacquiao nga mopaubos sab sa medical test sa Research Institute for Tropical Medicine (RITM) apan alang ni Pacquiao nga dili na kini kinahanglan.
“Naniniwala po kasi ako na marami tayong Persons Under Investigation (PUI) na dapat unahin pagdating sa testing,” pasabot sa Pambansang Kamao ng Pilipinas.
Ang mga opisyal sa Barangay Dasmarinas nga gipangulohan ni Rossana Hwang misugyot kaniya ug sa iyang pamilya mga mopaubos sa home quarantine human siya nag-host of fellowship dinner sa PDP-Laban sa ilang panimalay diin usa sa mga bisita sa Pimentel.
Nahimong viral ang video ning maong panagtapok.
“You have been identified as Person Under Monitoring (PUM) after the picture of you and Koko Pimentel in your house seen partying together went viral,” tipik sa suwat ni Hwang.
Apan gipasabot sa 8-division world champion nga nagpaubos na siya ug ang iyang pamilya sa home quarantine sa wala pa giisyu ni Hwang ang maong suwat.
“Nais ko pong linawin na bago ko pa man natanggap ang sulat mula kay Barangay Captain Rosanna Hwang, nakapag-simula na akong mag-home quarantine,” pagklaro ni Pacquiao.
Gumikan kay naka-home quarantine, matod ni Pacquiao nga wala siya nakatunga sa pag-turnover sa testing kits nga gi-donate sa iyang higalang si Chinese billionaire Jack Ma sa Manny Pacquiao niadtong Biyernes.
“Excited pa naman sana ako sa turn-over ng 57,600 testing kits mula sa aking kaibigan na si Jack Ma para sa Manny Pacquiao Foundation ngunit minabuti kong manatili sa bahay,” batbat ni Pacquiao. Nagkanayon si Pacquiao nga wala siya’y nasinati nga bisan unsang simtomas sa Covid-19. / ESL