NAGHANGYO karon ang lokal nga kagamhanan sa Davao City nga maghulat una ang mga Dabawenyo kinsa nagpuyo sa mga barangay ning siyudad nga wala pa narasyonan og mga relief goods.
Kini ang gipahibalo ni Davao City Mayor Sara Duterte-Carpio atol sa interbyu niini sa Davao City Disaster Radio sa nakalabay nga adlaw, Marso 26, 2020, Huwebes.
Sumala ni Mayor Sara nga nadugay ang ubang barangay sa paghatud sa mga relief goods gumikan nakulangan ang mga tawo nga maoy mo-repack sa mga relief goods.
Sa 182 ka mga barangay, duna pa lang 60 porsiyento niini ang nahatdan og mga relief goods sa unang batch sa rasyon kinsa kadtong mga barangay nga unang nakasumite sa ilang pinal nga listahan alang sa mga benepisyaryo.
Gipasabot sab ni Mayor Sara nga ang maka-benepisyo sa rasyon sa gobyerno kadto lamang mga pobre kaayo diin nawad-an og trabaho ang nangulo sa pamilya, ingon man kadtong mga contractual/no work, no pay ug out-of-work ang nangulo sa pamilya gumikan sa Covid-19.
Mahatagan sab og rasyon kadtong mga self-employed ug out-of-work nga mga nangulo sa pamilya ug kadtong mga low income nga mga nangulo sa pamilya.
Ang proseso, magpalista sa barangay, diin fill-up-pan ang form ug dayon papirmahan kini sa matag purok leader ug isumite sa barangay aron mahatagan og ration card.
Sa panahon nga moabot na ang mga relief goods, kinahanglan nga naa ang ration card sa pagdawat sa food packs aron malagdaan kini sa unang bahin.
“Hulat-hulat lang sa ta mga Dabawenyo, kay nakulang ta sa mga mo-repack sa mga relief goods,” tipik sa gisulti ni Mayor Sara. (Jeepy P. Compio)