DIRIYOT mabuta ang staff sa usa ka balay tambalanan human gisabligan og bleach alas 8:20 sa gabii niadtong Biyernes, Marso 27, sa Tacurong City.
Ang biktima nga wala gihinganli, nagtrabaho sa St. Louis Hospital sa Barangay New Isabela sa nahisgutang dakbayan.
Matud sa Facebook post ni Earl Sunday Perez, usa ka cataract surgery counselor sa nahisgutang ospital kinsa niadtong higayona nakauli na sa iyang balay, gipabalik siya sa balay tambalanan gumikan dunay pasyente nga nagkinahanglan sa iyang tabang.
Dako ang iyang kakurat gumikan ang pasyente, iya ra sab nga kauban sa St. Louis Hospital.
Nasayran nga pauli na unta ang biktima sa iyang gipuy-an sa Tacurong City sa dihang gisabligan siya og Zonrox sa wala mailhing mga tawo nga nasuko tungod sa pagtuo nga duna siyay kagaw sa coronavirus disease (Covid-19) kay nagtrabaho siya og ospital.
Gikanayon sa biktima nga nakasinati siya og sobrang kakatol ug kahapdos sa iyang mata human maoy nasabligan sa bleach.
Gipailawom dayon ang biktima sa eye procedure ug gihatagan og anti-inflammatory ug antibiotics eye drops aron makunhoran ang gibati niyang kahapdos sa mata.
Hinuon, giingong luwas na ang biktima ug naa sa maayong kahimtang Sabado, Marso 28, sa pagsulat ning balita.
Giklaro ni Perez sa katawhan sa siyudad nga wala silay kagaw (virus) ug unta dili na mausab ang hitabo gumikan sila nag-amping sab batok sa Covid-19 isip mga frontliners.