MAO ning mga panahuna nga lisod kaayo sa usa ka tawo nga naanad sa paugnat sa kusog, kay di na man makagawas aron makapasingot. Kon wa kay tuyo nga importante kaayo sa gawas, gidid-an ka sa paglakaw. Kon magpalit kag mga pagkaon, tambal o magpahiling ka sa doktor, mao ra ning panahuna nga tugtan ka sa paggawas. Kon mag-exercise ka lang, ayaw pagsuway kay di kana mahimo.
Nahitabo kini karon tungod sa enhanced general community quarantine nga manghod lang og gamay sa lockdown. Sa lockdown, way bisan usa nga makagawas sa balay. Ang kagamhanan maoy magrasyon.
Bisan tuod kon ingon niani ang sitwasyon, maayo na lang ni kay sa matakdan sa coronavirus disease (Covid-19) sa uban. Bisan kon naa ra kita sa balay, mahimo ra gihapon nga makapasingot.
Kon duna kay dumbbells sa inyoha, dako ning gamit sa pagpadayon sa imong weight training. Maayo na lang na kay sa wa. Kon duna kay stationary bike, padayuna kini sa paggamit kay at least,ma exercise ang imong mga paa ug sington ka pa.
Duna man kitay internet connectivity, mahimo rang anha sa Youtube mosundog sa Zumba, instead mag Tiktok. Okay ra man ang Tiktok isip lingawlingaw. But kon mao ra sab ning makaingon nga tapulan ka sa pagpasingot, di na maayo.
HIGH INTENSITY
Wa usab magkinahanglan og dako kaayong space ang gitawag og high intensity interval training. Sa gym, naa koy nakit-ang mga babaye ug lalake nga naghimo ani nga exercise. Wa magkinahanglan og gym kay nahimo ra gani sa kwarto nga dunay igong space sa paglihok.
Maanindot gani sa indoor exercise kay maubanan og music. Nindot ang paglihok kon ubanan sa music. Sa akong nakita, ang HIIT maayo baya kay di man maka build kaayog muscles, but fat burner. Base lang ni sa akong obserbasyon sa akong usa ka kaila ug usa ka higala nga ga-HIIT.
Kon di ka ganahan og Zumba, panahon na karon aron patyon ang kalaay sud sa balay.
MILIBOT
Niadtong miaging Dominggo, nagkuyog mi sa akong anak nga si Marylove, nanikad libot sa pipila ka bahin sa Siyudad sa Sugbo. Ako pud tong paagi aron makaobserbar sa karsada. Kaanindot sikaran sa mga karsada nga maihap lang ang mga sakyanan.
Mga duha ka oras lang ang among paglibot. Niagi mi sa IT Park, Marco Polo, Colon st., Fuente Osmeña ug nanguli.
Na enjoy mi sa pagsikad, apan mao na diay kadto ang katapusan nga tindak nako kay gidili na man ang paggawas. Bisan pa ini, mahimo ra tang makapasingot sud sa balay.