Editoryal: Positibong hitabo sa Covid

Editorial Art by John Gilbert Manantan
Editorial Art by John Gilbert Manantan

SUGOD kagahapon, Sabado, Marso 28, alas 12 sa udto, gisugdan na ang enhanced community quarantine sa Cebu City. Nagpasabot nga limitado na ang paglihok. Kon mogawas man, magdala og identification (ID) card kon wa pa makadawat ang panimalay og quarantine pass.

Mao karon ang panahon nga kinahanglan nga mosunod ang katawhan sa mando sa kagamhanan tungod kay alang kini sa kaayuhan sa tanan. Di baya tiaw ang hulga sa coronavirus disease (COVID-19).

Taliwa ning kalisod nga nahiaguman, duna bayay kaayuhan nga dala usab ang Covid. Ang labing una mao ang impact niini sa relasyon sa pamilya. Sukad gisugdan ang quarantine, naa lang kanunay sa balay ang kabataan ug mga ginikanan. Wa nay nakalaag kay ang internet cafes gipangsirhan man.

Kon kaniadto mag-iyahay og laag, karon nga duna nay ECQ, magka bonding na kanunay. Labina sa mga pamilya kinsang tanang mga sakop wa maapil sa exemption. Kay naa ra ang tanan sa balay.

Laing kaayuhan nga dala sa Covid mao ang kamingaw na sa kadalanan, paghinay sa produksyon sa mga pabrika. Sa ato pa, minos ang fossil fuels nga nangasunog. Kay minos ra, ang pollution miminos usab. Sa ato pa, nakaginhawa ang kalikupan gikan sa mga smoke emission, labina gikan sa mga sakyanan nga maoy number 1 contributor sa pollution sa urban centers.

Ning panahuna, masuwayan usab ang kapabilidad sa kagamhanan sa mga katalagman. Kining Covid karon maisip nga katalagman tungod sa grabeng impact niini. Kon ang bagyo molanat og mga tulo ka adlaw, dala sa epekto ini, ang Covid taas og lanat. Ning kataas sa iyang lanat ug grabeng impact, masuwayan ang mga pagpangandam sa kagamhanan. Makita dinhi kon asa ang kakuwangan, kalig-on ug kahuyangan sa iyang pagtubag. Dinhi, masukod ang tanan, kon ang kagamhanan kutob lang ba sa estorya, apan hangin ra diay ang tanan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph