HUGON-HUGON pa lang gani mo-implementar og lockdown ang kagamhanan sa dakbayan ug lalawigan sa Sugbo, nag-panic na ang katawhan. Niadtong Huwebes wala pa gani ni-anunsiyo si Mayor Edgardo Labella nga ipa-ubos ang dakbayan sa ‘enhanced community quarantine,’ nag-panic na gyud ang katawhan. Taas kaayo ang linya sa mga tawo sa mga supermarket ug mga grocery store, apil na gani ang mga botika. Hangtod kagahapon sa buntag mao gihapon ang nahitabo.
Nagsugod ang ‘enhanced community quarantine’ sa dakbayan kagahapon sa udto samtang ang sa lalawigan sa Sugbo karon pang Lunes. Wala na masunod ang social distancing gumikan kay ang mga tawo nagpunsisok aron makapalit sa ilang mga gikinahanglan aron makapundo atol sa usa ka buwan nga enhanced quarantine period. Sa mga terminal nagdasok usab ang mga tawo aron makauli sa ilang tagsa-tagsa ka mga lungsod ug dili mababoy dinhi.
Bisan pa man sa pahimangno sa mga opisyal nga di angay mag-panic ang mga tawo gumikan kay adunay igong supply sa pagka-on ug abre pa ang mga merkado, supermarkets ug grocery stores, di malikayan nga mabalaka ang katawhan. Sinugdanan pa lang kini ug wala pa kitay kalibutan kon unsa ang lintunganay niini.
Ubos sa mga kamanduan nila ni Labella ug Gov. Gwen Garcia, gidid-an na ang katawhan nga makagawas sa ilang panimalay kon walay importante ug tino nga lakaw. Wala nay public transportation nga tugutang makabiyahe. Karon, kon moadto ang mga tawo sa merkado ug supermarkets unya way kaugalingon nga sakyanan, unsay man intawon ang ilang sakyan uban sa ilang kinumpra? Ilang lukduhon unya maglakaw? Paita.
Samtang nanghambog ang atong mga opisyal nga dili angay mabalaka ang katawhan kay adunay igong supply sa pagkaon og tabang sa kagamhanan. Ang akong gikabalak-an mao lagi kon masuportahan ba sa kagamhanan ang panginahanglan sa katawhan ubos sa quarantine period. Kay dili naman makagawas ang katawhan, aduna bay pagkaon nga ihatud sa ilang pultahan? Dinhi nato makita ang katag kining pasalig sa atong mga opisyal. (bobbygnalzaro@gmail.com)