SUPERBALITA CEBU

Diola: Ngano man?

Mao Diay

SA pagduaw ni Papa Francisco sa Tacloban human sa Bagyong Yolanda niingon siya nga ang mga pulong “ngano man?” mahimong ipangutana ngadto sa Ginuo. Wala kini magpasabot nga wala kita mosalig Kaniya kondili tungod kay misalig kita, nangutana ta. Ang labing lisod kuno nga tubagon nga pangutana mao ang “ngano man?” kun “why”. Makapaukay kini ug motandog sa labing uyok nga bahin sa atong gibati ug panghunahuna.

Apan, sa pulong pa ni Papa Francisco human siya maminaw sa mga saysay sa mga biktima sa maong bagyo, sa ilang “ngano man?”, miingon siya: “Unsa may atong ikasulti?” Usahay diay kahilom na lamang ang atong tubag.

Suod nga higala ni Jesus si Lazaro. Apan sa dihang gipahibalo siya nga nasakit ang iyang higala, miingon lamang siya: “Kini nga sakit dili makamatay, apan alang kini sa himaya sa Dios, aron nga ang Anak sa Dios himayaon pinaagi niini”. Namatay si Lazaro ug upat ka adlaw ang milabay una miabot si Jesus sa Betania, diin gilubong si Lazaro ug diin nagpuyo ang iyang mga igsoon nga si Maria ug Marta.

Gisugat si Jesus sa mga pangutana sa mga igsuong babaye: “Ginoo, kon dinhi pa ikaw, dili unta mamatay ang akong igsuon”. Bitaw. Kon suod sila nga higala nganong wala may gihimo si Jesus aron ilikat ang pagkamatay sa iyang higala. Nganon man?

Daghan sad kitang mga pangutana atubangan sa hulga sa Covid-19. Nganong gitugotan man kini sa Ginuo? Nganong nagaagi man kita niining maong kalisdanan sa “enhanced quarantine” ug bisan gani “lockdown”? Unsa may plano sa Ginuo alang kanato, sa atong banay, ug sa atong kalibotan?

Kon mosiplat-lantaw kita sa atong ugma diha sa Dios, masaligon kitang moingon uban ni propeta Ezekiel sa saad sa Dios nga abrihan Niya ang atong mga lubnganan ug banhawon kita sa Ginuo. Nakapaukay kining Covid-19 kanatong tanan ug milutaw ang atong mga tinuoray nga kaugalingon. Naay mga natad o aspeto sa atong kinabuhi nga angayan mamatay ug ilubong: pagkatapolan, kauwag, kahakog, garbo, kasuko, way pugong sa pagkaon, ug kasina. Kinahanglan pulihan kini sa pagtuo, paglaom, ug paghigugma.

Mamatay kita sa mga hiwi nga panghunahuna ug binuhatan ug mabanhaw kita diha ni Cristo. Mahitabo ug ipahigayon kini sa Espiritu nga maoy nagbanhaw kang Cristo gikan sa kamatayon.

Wala gyod diay pasagdi ni Jesus si Lazaro kansang ngalan gipasabot sa pinulongang Hebreo, “Mitabang na ang Ginoo”. Gibanhaw niya kini ug dayag, saw ala gyoy pagduhaduha, ang pagka-Dios ni Jesus.

Makigsuod kita kang Jesus ug sa usag-usa niining mga panahona. Usa lamang ka letra ang nagpalahi sa “suod” ug “sulod”. Mahisuod kita kon mosulod kita sa kabubut-on sa Dios. Daghang kahigayonan gihatag kanato sa panahon sa quarantine aron makasulod sa kasingkasing sa Ginuo. Dili kini nato usikan.

Hinayhinay na ba natong natubag ang atong mga “ngano man?” sa kasamtangang panahon?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph