ANG Cebu City Government nihatag na sa kapin o kuwang 250,000 ka mga quarantine pass (QP) ngadto sa mga barangay kapitan sa 80 ka mga barangay atol sa pag-epekto sa enhanced community quarantine (ECQ) sa Sabado, Marso 28, sa Dakbayan sa Sugbo.
Kini human gi-deliver sa supplier ang mga card alang sa QP ug ipang-apod-apud sa mga barangay worker ngadto sa tagsa-tagsa ka mga balay sa ilang dapit.
Base sa Executive Order No. 65, matag usa ka balay, usa ka QP ang ihatag sa Siyudad pinaagi barangay official o worker para maoy gamiton sa ilang paggawas kon mopalit og pagkaon ug ubang gikinahanglan sa ilang pinuy-anan.
Si Kapitan Neressa Doncillo-Calalang sa Barangay Paril, bukirang bahin sa siyudad, nagkanayon sugod sa Dominggo sa buntag, Marso 29, kauban ang mga barangay official ug personnel, sila mohatag ngadto sa tagsa-tagsa ka mga nagpuyo sa matag balay.
Si Konsehal Raymond Alvin Garcia, majority floor leader sa City Council, nagkanayon nga gihatagan hangtod sa Marso 31 ang mga barangay official sa pag-distribute sa mga QP.
Si Garcia nagkanayon nga sugod Abril 1, ang mga residente sa dakbayan di na makagawas sa 14 ka mga border sa Cebu City kon way QP.
Di sab sila mahimong mogawas sa ilang balay kon wa ang card. Ang mga QP way ngan sa representante sa pamilya, inay control number ang ilang gibutang.
Kini aron magamit sa ubang mga sakop sa pamilya nga maoy suguon pananglit di makagawas ang usa ka sakop.
Ang di mga residente sa siyudad mahimong makakuha og QP nga color blue apan kinihanglan silang mopadala og email sa ccg.ecqpass@gmail.com nga adunay subject code “NR - (Family NaMe) - (LGU of Residence).
Mopadala sila og letter request para sa usa ka individual para sila mahatagan og pass.
Apan ang mga nalatid sa EO-64 ug 65 nga exempted o wa maapil sa stay at home nga EO, di na kinahanglan nga mokuha sa QP.
Ipakita lang ang ilang mga identification (ID) card o certificate of employment. /