GIOBSERBAHAN karon sa Cebu City Medical Center (CCMC) ang usa ka drug suspect nga napusilan sa usa ka pulis duol sa bugan niadtong Biyernes sa gabii, Marso 27, 2020 sa Barangay Sawang Calero, Siyudad sa Sugbo.
Si Police Major Eduard Sanchez, hepe sa San Nicolas Police Station, maoy nangu sa ronda, niingon nga naangol ang ilang target nga si Alvin Mercado, 24, human gisuwayan pag-neutralize kay namusil, nieskapo.
Si Mercado taga Sityo Buwaran, Barangay Sawang Calero ning siyudad.
Matod ni Sanchez nga si Mercado nadungog nga magpabuto kanunay sa iyang armas.
“Tingala gali ko ani nga sugod sa akong paglingkod, sige na ni ma-report sa amo. Siguro mga katulo nga higayon. Wala pay labot na sa kadtong unang hepe ha.Nganong naa man siya armas?,” butyag ni Sanchez
Dugang ni Sanchez nga nakadawat usab ang iyang mga sakop og impormasyon sa giingong pagpamaligya og shabu hinungdan nga gipasuta niya kon tinuod ba.
“Mga lima ka adlaw na ko nga gipalakaw ni sa akong mga sakop ug namaligya gyud diay. So, wala mi rason nga dili namo siya operasyonan,”dugang ni Sanchez.
Atol sa buy-bust, si Mercado ni-transact sa poseur-buyer nga pulis daplin sa fish port area tungod sa pagtuo nga mingaw na ang lugar.
Dihang nakakita si Mercado, nagduda na siya kay bag-ohay pa lang siya napalitan.
“Nakita nako nga na alanganin si Mercado nga makasibat, nagpabuto og una ang suspek. Pero ang buto niini dili kaayo kusog mao nang gipusil ni sa akong pulis kay kusog man kaayo modagan gud,”matod ni Sanchez.
Ang punterya sa pagpusil kang Mercado tiil unta, apan didto sa tungod sa suspek ang sementadong lugar ug niuntol ang bala paingon sa bugan. Nieskapo si Mercado, apan wa na makadagan tungod sa ka sakit.
“Maoy akong pagtuo nga tiilon si Mercado. Pero sa tantong dagan didto nibanda sa semento ug niuntol paingon sa iyang bugan kay wala may samad ang tiil niya,” dugang ni Sanchez.
Si Mercado gibantayan og pulis sud sa ospital.
Nasakmit gikan kang Mercado ang shabu nga gibana-bana nga mobalor og kapin sa P130,000 base sa Dangerous Drugs Board (DDB) value. /