SA prisohan nagtingkagol ang 23-anyos nga uyoan human nadakpan niadtong Biyernes sa gabii sa mga sakop sa San Nicolas Police Station tungod sa reklamo sa iyang 12-anyos nga pag-umangkon ug inahan.
Matod ni Police Corporal Jerley Enad, imbestigador sa Women and Children Protection Desk, nga ang bata ug iyang inahan ningdangop sa police station sa Biyernes, Marso 27, 2020.
Ang biktima ug uyoan naa lang sa usa ka balay nagpuyo, apan gipugngan ni Enad ang mga ngan ug address agig proteksyon.
Si Danica (di tinuod niyang ngan), niingon nga ang bata nitug-an kaniya nga kanunay siyang hinulon sa iyang uyoan kon sila rang mahabilin sa balay magabii kay manglakaw ang iyang mga ginikanan aron manginabuhi.
Makadaghan na kini buhata sa iyang uyoan kon sila mangatulog na.
Kon mangatulog na sila, ang iyang uyoan modug kaniya, hikapon ang nagkadaiyang bahin sa iyang lawas, apil na ang pribadong bahin. / BBT