NAKAKAT-ON ug nahimong bililhon sa 152 ka barangay health workers (BHW) sa lungsod sa San Fernando ang mga iysu sa kahimsug nga may labot sa dili hustong gawi sa pakighilawas sa pipila sa komunidad.
Nagkatigom sila ni’ng bag-o pa lang alang sa usa ka seminar sa kahimsug nga misilbi sab nga panghinapos nilang kalihukan sa miaging tuig didto sa multi-purpose recreation center sa Taiheiyo Cement Philippines, Inc. (TCPI).
Mipahigayon si Dr. Ildebrando Estella, doktor sa kompanya, sa seminar nga “Awareness of STD, HIV, AIDS in the Community” nga mihatag sa mga misalmot og mga kapanguhaan nga hinikay sa TCPI medical team.
Pasabot sa STD ang sexually-transmitted disease, HIV alang sa human immuno-deficiency virus nga moatake sa mga selyula nga mao unta moabag sa lawas batok sa mga motakod, ug AIDS alang sa acquired immune-deficiency syndrome, ang sakit nga madangatan kon dili masanta ang HIV.
Gimanggad ni Mayor Lakambini Reluya ang pagbulig sa TCPI nga matanyagan ang mga BHWs og mga seminar sa kahimsug maka-upat matag tuig, samtang giila niya ang pagpanaghan sa mga kaso sa STD, HIV ug AIDS sa San Fernando.
Gihangyo niya ang kompanya nga iapil sa mga hisgutan ang ubang mga isyu sa kahimsug nga nabatyagan sa lungsod, sama sa pangisip aron matabangan pag-sulbad sa mga kaso sa depresyon, pagmabdos sa mga bata pa, ug malnutrisyon.
Misunod atol sa panagtigom ang indigay sa sayaw nga agi og pagsadya sa panag-uban nilang mga BHW gikan sa 13 ka mga impact barangay sa TCPI uban sa tigsangkap niini nga Solid Earth Development Corp. (SEDC).
Naglakip kini sa Basak, Bugho, Cabatbatan, Ilaya, Magsico, North Poblacion, Panadtaran, South Poblacion, Tabionan, Tañañas, Tinubdan, Tonggo ug Tubod.
Nagmadaugon ang mga mananayaw sa Bugho nga misakmit sa P4,000 nga grand prize, gisundan sa Magsico nga nakakuha’g P2,000 kay nakakaduhang dapit, samtang ang Panadtaran nakatulong dapit ug midaug og P1,500.
Ang ubang mananaug sa ika-4 nga dapit ang North Poblacion nga nikita og P1,000 nga cash prize; ika-5, Tinubdan, P500; ug ika-6, South Poblacion, P500 sab.
Gitunol nila Dr. Estella ug Vanessa N. Bongcawil, tagduma sa TCPI community and general affairs section, ang mga pamatuod nga nakatambong ug mga gasa sa mga BHW nga didto sa kulminasyon.
Gipasiugda sa TCPI ang kalihokan mga lakip sa information, education and communication nga mga paningkamot sa kompanya ubos sa Social Development and Management Program. (PR)