GIPANGKANSELAR sa promoters ang ilang sporting events nga gikatakda unta karong buwana ug sa Abril tungod niining dakong hulga sa coronavirus sa tibuok kalibutan.
Apan sa iyang bahin, si UFC President Dana White pursigido ug determinado nga iyang ipadayon ang gikatakdang away tali ni Khabib Nurmagomedov ug Tony Ferguson karong Abril 18, 2020.
Giangkon man tuod niya nga tungod niining global pandemic, naglisod siya sa pagpangita og dapit nga iyang kapahigayonan niini. Apan iyang gibutyag nga aduna na siyay upat o lima ka mga dapit nga adto niya ipahigayon ang kombati.
Wa niya isalikway nga ang maong event mapahigayon gawas sa Estados Unidos ug dili kini linawas nga patan-awan sulod sa arena. Gipahibawo ni White sa iyang laraw si kanhi heavyweight champion Mike Tyson kinsa hugot usab misuporta niini.
Nakadawat man tuod og daghang pagsaway si White tungod kay nagrisgo kini sa mga empleyado sa posibling mataptan sa Covid-19 virus, apan matod niya nga nagkinahanglan ang fighters og kuwarta ug kini maoy nag-pressure kaniya.
“It’s nuts, but I’m going to try and pull off Tony v Khabib on April 18 and try and get some normality back in this country,” pasabot ni White. (JBM)