GITIMBANGTIMBANG karon sa USA Basketball ang pag-ilis sa lineup sa Team USA tungod sa posibling pagtumaw unya sa conflict sa schedules tungod ning pagdelatar sa Tokyo Olympics.
Kon ang pag-uswag sa Olympics adto na sa Marso o Abril sa sunod tuig, dili na available ang players sa NBA niini tungod kay mao na man unya kini ang buwan sa pagsugod sa playoffs.
Wala pa gyuy tino nga petsa alang sa Olympics human gipahibawo sa International Olympic Committee sa miaging semana nga i-postponed ang mga duwa tungod sa coronavirus pandemic.
Si Jerry Colangelo, managing director sa USA Basketball, kinsa gitahasan nga maoy modala sa team hangtod sa 2021 uban sa headcoach niini nga si Gregg Popovich, mibutyag nga wala pa gyud sila kalihok niini tungod kay wala pa gyuy tukma nga petsa sa pagpahigayon sa Olympics.
“We will follow the leader. We have to wait to see how everything is laid out and we’ll make the adjustment,” padayag ni Colatngelo. “Our players are NBA players first, let’s face that.”
Apan kon ang Olympics ibalik ngadto sa ilang calendar year nga mao ang buwan sa Hulyo, daghang NBA players ang makaduwa.
Kon kini sa Abril, hayan mapugos sila sa pagparada og amateur players o college players. (JBM)