SUPERBALITA CEBU

Nadela: Dili saktan og pamulitika

AMBOT og ngano nga di man gyud makasabot ang uban sa mando gikan sa mga tinugyanan sa panglawas nga modistansiya sa usag-usa isip usa sa mga panagang batok sa coronavirus. Gahapon sa buntag akong gikonpirmar ang report nga akong nadawat nga nagkalandrakas lang ang agi sa mga mamalitay sa Inayawan Public Market. Wa gyud masayop ang nagpahibalo nako.

Gikan sa isdaan, karnehan, lahos na sa baligyaanan og utanon, lamas ug grocery products, sama ra sa ordinaryong adlaw ang talan-awon sa mga mamalitay. Diha hinuoy namalit nga akong nabantayan nga naninguha gyud nga modistansiya gikan sa uban. Pero pila ra ni sila ka buok itandi sa mas daghan nga wala magtamod sa social distancing nga gustong ipatuman sa gobyerno.

Labot sa face mask pila ra ka buok ang akong nakit-an nga wa magsul-ob. Human ko makahigop sa ginatasan nga kape sa usa ka painitan duol sa dry goods section, usa ka babaye ang niduol sa laing kustomer nga wa magsul-ob sa iyang face mask. Iyang gisultian nga isul-ob kini. Humana hinuon makapangape ang maong kustomer.

Ang maong babaye nga mas pangedaron na, sa akong pagtuo usa sa mga tinugyanan sa merkado.

Didto hinuon sa Pardo Public Market niadtong Sabado sa buntag, estriktong gipatuman ang social distancing. Pila ra ka buok kustomer ang gitugutan nga makasud. Ang bagang duot sa mga pumapalit gipalinya sa gawas samtang magpaabot sa ilang turno.

Di makasud ang di magsul-ob og face mask. Mao sab sa mga botika. Taas nga kutay sa mga pumapalit ang akong nasaksihan. Sa akong pakisusi nganong nagkarakara sila og pamalit, lockdown maoy ilang gikahadlokan. Basin daw di na sila makagawas sa balay. Mao nga nagdali silang makapangumpra. Kalooy sab. Sayop nga inpormasyon maoy nagtukmod nila nga mabutang sa peligro ang ilang panglawas. Kinsa may mabasol niini? Di ba mao man sab ni ang nahitabo sa ubang dapit?

Tungod sa isyu sa lockdown nagbaha ang daghang mangumprahay. Gidumog sa daghang pasahero ang mga bus terminal. Namakyaw na gud og taga liog nga presyo ang uban para lang makapauli. Kinsa man gihapoy mabasol niini? Ang laing gidumog hinikalimtan ang kamahinungdanon sa social distancing mao ang pagpang-apud-apod sa mga hinabang nga bugas ug de latang pagkaon. Nganong naingon man ta niini?

Di ba pagkahuman sa Sinulog nibuto man dayon ang makalilisang nga balita labot sa pagkuyanap sa coronavirus didto sa Wuhan, China? Taudtaod na baya tang gipahibalo sa posibling pagkuyanp niini padung dinhi sa ato. Pero kon tan-awon nimo ang sistema nga gipatuman layo ra gyud sa tinuod. Sagdi nalang karon pa man ta nakasulay og ingon niini nga virus. Makasabot ra ta sa nagkatuiris nga pamaagi nga gisagop.

Ang di gyud nako madawat kini gyung saktan og pamulitika. Pastilan. Labaw pa ni sa gubat ang atong giatubang kay di ta ka kita sa atong kontra apilan pa gyud og salida nga klaro kaayong pamulitika. Di hinuon tanan. Pero kon mangapasmo gani na nang uban diha, bantay lang gyud mo. Hangtod sa hangtod di gyud mo pakatulgon sa inyong konsensiya.

Sa mga nagtinarong unya wa lay suwerte kay di sila kaalyado sa mga naa sa gahum, ayaw kaluya. Sa kalibutan pa sa pamoksing, unyag katumba bangon og panukmag. Makatayming diay ka sa gitawag nga lucky punch.

Molurang ra man ning tanan nga kalisdanan. Kamong gilisodlisod mosuroy ra gihapon naglisodlisod ninyo aron mangayo sa inyong suporta.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph