SUGOD karong adlawa, Lunes, Marso 30, gipatuman ang total lockdown sa entiro lalawigan sa Sugbo. Ang taga lalawigan sa Sugbo di na makasulod sa siyudad sa Sugbo. Ang taga siyudad sa Sugbo di na sab makasulod sa probinsiya. Sirado na ang borders kon mga utlanan.
Mao kini ang enhanced community quarantine. Taas kaayo. Mas mubo ang lockdown. Gipatuman kini kay konpirmado nga dunay 19 ka mga kaso sa Covid-19 sa siyudad sa Sugbo. Samtang usa pa lang ang konpirmado nga Covid-19 case sa probinsya.
Ang travel restrictions nakita nga epektibo sa pagkontrolar sa pagkuyanap sa coronavirus gikan sa mga dapit nga dunay gitakboyan ngadto sa ubang mga lugar.
***
Dunay nangutana kon makoral ba diay ang coronavirus? Sa di pa nato kana sumpayan, atong lakbitan ang makapahimuot nga tikdol ni Cebu Governor Gwendolyn Garcia sa mga pilosopo sa dihang gidili niya ang pag-adto sa mga beach resort.
Ang mga pilosopo, matod pa niya, nireklamo nganong idili ang pag-adto sa mga beach resort nga ang dagat makapatay man sa virus. Mao nga niingon siya nga mahimo silang motidlom ug mosawom sa dagat, pero kon motunga gani, dakpon.
Ang coronavirus, sanglit di makita, di makoral. Ang tawo nga mahimong maoy carrier sa coronavirus makita apan di sab makoral. Busa gidid-an sa nga wa kinahanglana nga pagbiyahe.
***
Wa man kinahanglana ang pagkoral sa mga tawo. Unsa man na sila mga baka o karnero? Labi na kon pagwardyahan pa gyud og mga pulis. Syaro sab kon di na sila motuman sa self-quarantine?
Mao bitaw na nga wa motuo ang mga tawo kon miingon ang mga opisyal nga way Covid-19 case sa Cebu City unya makita nila nga dunay compound nga gikoral ug gibantayan og mga pulis.
Hisgot tag mga opisyal, si Senador Manny Pacquiao niawhag sa nga opisyal nga magpakita ug moserbisyo sa katawhan panahon sa corona virus. Di siya mahadlok nga mamatay alang sa mga tawo. Si Guv Gwen ug si Cebu City Mayor Edgardo Labella wa maghuwat sa awhag ni Pacman.