HINGPIT nang sirado ang Sugbo sa mga bisita human sa dungan nga pag-epekto sa executive orders (EO) sa Kagamhanan sa siyudad sa Mandaue ug lalawigan sa Sugbo sa pagpatuman sa enhanced community quarantine (ECQ) sa komunidad untop alas 12:01 sa tungang gabii karon, Lunes, Marso 30.
Una nang nipatuman sa ECQ mao ang Dakbayan sa Sugbo niadtong Sabado sa udto, Marso 28, ug Dakbayan sa Lapu-Lapu kagahapon, Dominggo, Marso 29. Ang tulo ka local government units (LGUs) pulos highly urbanized cities nga independente sa kamandoan sa gobernador.
Apan mas hapsay seguro ug mas nindot tan-awon nga dunay koordinasyon kon nagdungan ang nahisgotang LGUs sa pagpatuman sa lockdown. Dili maglibog ang mga tawo sa ‘protocols’ kon mausa kini sa pagpagawas.
Ug sama sa mitumaw nga matag ang LGUs buot ma-starring o mabutang sa spotlight ang iyang lakang sa pagsanta sa pagkaylap sa coronavirus disease 2019 (Covid-19).
Dili kini maayong sinyales sa liderato, ang pataasay og utong o garbo? Apan ihiklin una nato kining baho sa kinaraan pamulitika, ang importante nga napatuman gyud ang higpit nga limitasyon sa kontak sa mga tawo pinaagi sa lockdown.
Nakita nga malampuson ang unang pagpatuman sa ECQ sa dakbayan sa Sugbo ug Lapu-Lapu niadtong Sabado ug Dominggo. Siyento porsiyento ang pagsanong sa katawhan. Bakante kaayo ang kadalanan. Unang higayon nga ingon niini ang talan-awon, subra pa sa kuwarisma tungod sa 24 oras nga curfew.
Sa pagpatuman sa ECQ, apektado ang kinabuhi natong tanan apan mas makaluluoy ang mga kabus labi na katong masikop nga kakha-tuka. Ang kagamhanan dunay hinabang kaninyo busa dugang pag-antos, pagsabot ug atong ipatunhay ang kahiusahan.
Dili tiaw ang krisis mugna sa Covid-19. Dili lang dinhi sa Sugbo apan, sa tibuok kalibotan. Di makita. Way gipili. Mikalas na og daghang kinabuhi sa daklit lamang nga panahon.