PATAY ang 53 anyos nga balot vendor nga nangulitawo sa usa ka biyuda sa dakbayan sa Carcar, dihang gitabangan og dunggab sa managsuong pag-umangkon sa babaye niadtong Biyernes sa gabii, Marso 27.
Si PSSgt. Raymon Amante sa Carcar City Police Station, miila sa biktima nga si Reynante Nayre, 53, buwag sa asawa ug molupyo sa Barangay Mohon, dakbayan sa Talisay.
Ang mga suspek nailhan nga sila si Marsan Giminez ug Jimboy Giminez, pulos hingkod ang edad, ug molupyo sa Sityo Bagakay, Barangay Valencia, Carcar.
Sa imbestigasyon sa kapulisan sa insidente, ang biktima anaa sa sulod sa panimalay sa usa ka Gemma Dela Cerna, iyaan sa mga suspek.
Sa pamahayag sa saksi nga si Gemma, 42, ug ang biktima nga si Reynante nag-istoryahanay sulod sa panimalay sa babaye.
Sila si Marsan ug Jimboy giingong kalit lang mibutho sulod sa panimalay sa ilang iyaan.
Walay daghang istorya ang duha nga pulos dunay dala nga mga kutsilyo gitabangan og dunggab si Marsan nga nakaangkon ug mga samad dinunggaban sa lawas niini.
Ang biktima bisan samdan na nakahigayon pa og ilog sa kutsilyo nga gihawiran ni Jimboy ug dayon dunggab pila ka higayon ngadto na kang Marsan, nga miresulta usab sa pagkaangkon og mga samad dinunggaban niini.
Tungod sa pagbawos sa biktima ngadto sa usa sa mga midunggab kaniya, maoy hinungdan nga nabungkag ang tulo dayon sibat sa duha ka managsuon.
Si Nayre tungod sa naangkon nga samad dinunggaban sa iyang lawas, namatay diha dayon.
Samtang, ang managsoun nakahigayon pa sa pagsibat human sa hitabo.
Dugang ni Amante nga si Jimboy nakahigayon gyud og sibat sa lugar samtang si Marsan gidali og dala sa iyang pamilya sa ospital tungod sa nahiaguman nga samad dinunggaban.
“Mao to nga among naabtan sa among follow-up operation si Marsan mao to nga gipakuyogan nalang sa among hepe og pulis aron maoy magbantay kay suspek man to siya ug naa karon sa Vicente Sotto,” matod ni Amante.
Ang kapulisan sa Carcar pabiling naninguha nga madakpan ang igsoun ni Marsan kinsa naka-hospital arrest.
Personal grudge o bunga sa kalagot sa mga suspek sa pagpangulitawo sa biktima sa ilang iyaan maoy gisubay nga anggulo karon sa kapulisan nga maoy ilang gituohang motibo nganong giplanohan sa managsuon nga mga suspek nga patyon si Nayre. (BBT)