SI CEBU City Councilor Prisca Niña Mabatid nagkanayon nga ang ulahing taho sa Department of Health (DOH) 7 bahin sa update sa coronavirus disease (Covid-19) cases sa dakbayan sa Sugbo ‘nagpamatuod sa iyang pamahayag.’
“I’m relieved it’s out and open to the public. This is an affirmation of my earlier statement that Cebu is not spared from this pandemic,” matod ni Mabatid, nahimong kontrobersiyal sa iyang unang pamahayag nga nagbutyag sa dugang kaso sa Covid-19.
Si Mabatid nag-post sa iyang Facebook account nga dunay tulo ka mga pasyante nga gidudahang dunay Covid-19 sa dakbayan sa Sugbo ang namatay.
“Three died already with suspected Covid here in Cebu City. Namatay nalang wa pa gihapon na-test. It can be Covid or it can be not. Imagine pila na kaha kabuok positive. More than 10 that are in the hospital now,” tipik sa post ni Mabatid sa iyang Facebook account.
Giawag niya ang publiko nga magpundo sa ilang balay aron pagsanta sa posible nga pagkuyanap sa virus.
Niadtong Marso 28, 2020, ang DOH Central Visayas nitala og 19 ka bag-ong kaso sa Covid-19 sa siyudad sa Sugbo.
Sa bag-ong 19 ka kaso, 16 ang na-admit, duha ang namatay ug usa ang naayo, sukawahi sa pamahayag ni Mabatid nga tulo na ang namatay.
Si Mabatid nagkanayon nga ang gidaghanon sa kaso “to spike in the days to come.”
Kahinumdoman, ang DOH 7 nagsunod og protocol una mopahibalo sa publiko bahin sa update sa kaso sa Covid-19 ug magtagad pa og pagtugot gikan sa ilang buhatan aron paglikay sa kalibog sa data tali sa rehiyon.
Dugang sa DOH, bugtong batid sa medisina ug awtorisado sa departamento ang gitugotan sa paghimo sa pagpahibalo sa sitwasyon sa krisis sa panglawas aron dili makamugna og panic o kabalaka sa publiko.
“We ask the public not to panic as containment measures have already been in place in coordination with the respective local government units (LGU), and the local police of the confirmed cases,” sumala sa uwahing pamahayag ni Dr. Jaime Bernadas, director sa DOH 7. (JJL, RRM)