SA UNANG adlaw sa implementasyon sa Enhanced Community Quarantine (ECQ) sa dakbayan sa Sugbo, dunay tensiyon sa Barangay Bulacao, dakbaan sa Sugbo nga utlanan tali sa dakbayan sa Talisay sa lalawigan human gipakanaug sa kapulisan sa bus niadtong Sabado sa gabii, Marso 28.
Si Gobernador Gwen Garcia personal nga niabot sa dapit ug gikasab-an ang usa ka pulis nga usa sa mga nagpatuman sa checkpoint.
Ang pulis nangatarungan nga nagtuman lang sila sa mando sa ilang labaw.
Samtang, ang police reports sa mga presinto sa Cebu City Police Office (CCPO) nagmatuod nga malinawon ang dakbayan human walay na-blotter nga krimen.
Kini ang gipadayag ni Police Colonel Hector Grijaldo, pangulo sa CCPO, diin ang matag entry ug exit sa dakbayan adunay gipahigayon nga health checkpoint.
Si Grijaldo nanawagan sa usa ka milyon ka mga tawo sa dakbayan sa pagsunod sa mga lagda nga giluwatan ni Mayor Edgardo Labella subay sa gipangluwatan nga Executive Orders aron mapadali ang pagbalik sa normal nga sitwasyon sa Sugbo.
Apan ang pangulo CCPO nagkanayon nga taliwa sa pagpakatap sa mga pulis sa daghang mga checkpoint, anaa gihapon ang mga pulis kinsa nakatutok sa illegal nga kalihukan.
Gipadayag niya nga walay mga shooting incident, pagpanglungkab ug ubang matang sa panghitabo atol sa unang adlaw sa pagpatuman sa ECQ.
Si Labella nanawagan usab sa mga tawo nga mosunod sa mga lagda sa ECQ aron dili na mosamot pa ang sitwasyon sa Covid-19 cases. (PAC, RRM)