GITAKDA nga magsugod pagdawat ang infirmary, o first response area sa Cebu City nga kapahilunaan sa mga 'mildly Covid-10 symptomatic persons' nga dili ma quarantine sa balay, sunod semana.
Ang maong infirmary nahimutang sa basketball court sa karaan nga building sa Sacred Heart School (SHS-Ateneo de Cebu), sa Gen. Maxilom Ave. sa Dakbayan sa Sugbo.
Kagahapon, Marso 29, 2020, nakig-miting si Sec. Michael Dino, sa Office of the Presidential Assistant for the Visayas, kauban silang Cebu City Councilor Raymond Garcia, Regional Development Council 7 chairman Kenneth Cobonpue sa mga doktor ug physical committee sa infirmary ug mga representante sa Ramon Aboitiz Foundation Inc. (Rafi) aron pag-finalize sa mga kinahanglanon sa infirmary.
Matod ni Dr. Tony San Juan, miyembro sa committee on physical plan, nga lakip sa ilang mga gikonsiderar sa infirmary mao ang airflow niini ug ang pamaagi sa pag-segregate sa mga moabot nga pasyente aron walay mahimo nga cross contamination tali sa pasyente ug mga health care workers.
“The last thing we want is droplet contamination so the air flow has to be in one direction. We could not have it flow to the community there because it is going to be an issue. What we figure is to have it move towards the space at the back,” matod niya.
Aron mahimo kini, kinahanglan nila mogamit og dagko nga industrial fans aron sa huyop sa hangin ngadto sa lugar nga walay mga balay ug ang condenser fans aron sa pag-mist gamit ang disinfectant solution.
Una na nga mipasalig ang Rafi ug ang uban nga mga pribadong grupo sa paghatag niini.
Natunga ang infirmary sa duha ka zones nga gitawag og yellow ug red zones.
Ibutang ngadto sa yellow zone ang mga pasyente nga gi- presume nga positibo sa virus apan mild lang ang sintomas ug dili kinahanglan nga i-admit sa ospital samtang naghuwat sa confirmatory result.
Gikinahanglan nga ibuwag ang mga pasyente sa yellow zone gamit ang gitawag nga transparent partitions aron dili sila makatakod sa matag usa.
Samtang, ibutang ngadto sa red zone ang mga pasyente nga kumpirmado nga adunay Covid-19.
Aduna usab swabbing area, donning ug doffing area, ug decontamination area nga gitawag nga sunny station tubes alang sa health workers, ang infirmary.
Nagkinahanglan og di mominos sa 30 ka mga volunteer nurses ug siyam ka volunteer doctors ang maong infirmary nga kapahilunaan sa di mominos 120 ka mga pasyente.
Banos-banos ang pag-duty sa volunteer nurses ug doktors.
Usa ka grupo (10 nurses and 3 doctors) matag semana ang mo-duty. Human sa usa ka semana, kinahanglan sila mopaubos sa duha ka semana nga quarantine usa sila maka- duty og balik sa infirmary.
Gisabutan pa karon sa OPAV ug Cebu City ang proposals alang sa honorarium sa maong mga mo-volunteer. (WBS)