KON ang kagamhanan sa lalawigan sa Sugbo wala mohatag og libreng sakay atol ning panahon sa lockdown, ang ubang local government units (LGUs) sa Metro Cebu dunay libreng sakay sulod lang sa ilang hurisdeksiyon.
Sa dakbayan sa Mandaue diin nagsugod sa ilang lockdown karon, Marso 30, dunay giandam nga unom ka mga Ceres bus ang mohatod sa frontliners sama sa health workers lakip sa mga empleyado sa gobyerno ug essential nga establishments nga gitugotan sa pag-abli.
Sa dakbayan sa Sugbo, dunay 20 ka MyBus units ug dunay kinatibuk-ang 40 ka buses nga mobiyahe gikan sa alas 5 ngadto sa alas 9 sa buntag ug alas 5 sa hapon ngadto sa alas 9 sa gabii.
Ang Talisay mopadagan og 200 ka tricycles, dunay buses ug vans.
Sa Lapu-Lapu, kadaghanan sa kompaniya sa Mactan Export Zone (MEZ) dunay bus sa alang sa mga kawani samtang ang dakbayan mopadagan og libre nga buses. (KFD, JJL, JCT)