“I am now considering Cebu City as the epicenter of the virus in the province.”
MAO kini pamahayag ni Gob. Gwendolyn Garcia atol sa press conference kagahapon sa hapon, Dominggo, Marso 29, sa Kapitolyo.
Nabalaka si Garcia sa bag-ong 19 ka konpirmadong kaso sa Coronavirus disease 2019 (Covid-19) nga naa sa dakbayan sa Sugbo hinungdan nga gipatuman ang hugot nga enhanced community quarantine (ECQ) aron pagpanalipod sa lalawigan.
Apan, matod sa gobernador, bugtong makasulod-balik sa lalawigan mao adtong dunay vehicle quarantine pass (VQP) nga nalakip sa lista sa mga exempted.
Ug sugod kaganinang alas 12:01 sa tungang gabii, Marso 30, Lunes, miepekto na ang mas gihigpitan nga ECQ base sa Executive Order No. 5-O ni Garcia.
Subay sa maong EO, ang protocols ug guidelines, ang mosunod gitugotan nga makasulod-balik sa probinsya, pinaagi sa mga utlanan sa siyudad sa Mandaue sa amihanan; dakbayan sa Talisay sa habagatan; lungsod sa Balamban sa kasadpan ug sa lungsod sa Cordova sa isla sa Mactan:
1. Gobernador, Bise Gobernador ug Board Members
2. Justices sa Supreme Court, Court of Appeals, Court of Tax Appeals, ug Sandiganbayan
3. Ombudsman ug Deputy Ombudsman
4. Congressmen sa lalawigan sa Sugbo, lone district sa siyudad sa Lapu-Lapu ug siyudad sa Sugbo
5. Judges ug skeletal workforce sa regional, metropolitan, city ug municipal trial courts
6. Regional ug provincial directors sa lainlaing nasodnong mga ahensiya sa gobiyerno
7. Local Government Officials
8. Mga miyembro sa diplomatic corps sama sa consuls ug ambassadors
9. Mga empleyado sa kagamhanan sa probinsya sa Sugbo
10. Mga empleyado sa kalungsuran ug component cities sa lalawigan sa Sugbo nga gi-authorize sa mga mayor
11. Mga piskal ug apil sa skeletal workforce sa ilang mga buhatan
12. Mga skeletal workforce sa ubang mga ahensiya sa gobiyerno
13. Mga opisyal ug mga empleyado sa Department of Health
14. Pribado ug publikong mga doktor, nurses ug ubang medical personnel
15. Mga trabahante sa mga tambalanan, administrative staff ug janitors
16. Mga miyembro sa Philippine Red Cross nga dunay official functions
17. Mga miyembro sa media nga accredited sa Kapitolyo
18. Mga sakop sa Philippine National Police (PNP), Armed Forces of the Philippines (AFP) ug ubang security personnel
19. Field personnel sa Visayan Electric Company, Water Districts ug Telecommunication Companies sama sa PLDT, Globe, Smart, Sun ug ubang telcos
20. Mga nagtrabaho nga may kalambigitan sa elektrisidad, fuel ug petroleum apil na kadtong nagbuhat og technical services.
21. Mga opisyal ug mga empleyado sa mga banko ug ubang money transfer establishments
22. Mga personnel sa delivery cargo (duha ra ka tawo apil ang driver)
23. Mga tawo nga adunay pre-existing medical condition nga kinahanglan moadto sa hospital/doctor para magpatambal. (Apan magkinahanglan og medical certificate ug certificate gikan sa ilang mayor)
24. Mga tawo nga nalambigit sa mga disgrasya ug medical emergencies (adunay usa ka paryente o kauban sa balay ug usa ka driver ra ang kuyog)
“Ayaw dumoga ang mga opisina sa mayor kay mangayo mo og vehicle pass. Kay hinumdomi wa na guy public transport mao na nga ang katong mga exempted kinahanglan mo og vehicle pass," dason niya.
Si Garcia mosusi sa mga border sa lalawigan aron maseguro nga napatuman sa hingpit ang ECQ. (ANV, RTF, SCG)