TANAN nga trabahante nga “no work, no pay” nga nahunong gumikan sa coronavirus disease (Covid-19), naghinam-hinam na kung kanus-a nila madawat ang tag P5,000 nga ihatag sa gobyerno pinaagi sa Covid-19 Adjustment Measures Program kon (CAMP) sa Department of Labor and Employment (Dole).
Sa Davao Region, eksayted na ang mga trabahante nga ilang madawat ang salapi aron makatabang sa inadlaw nga panginahanglanon, luyo niining krisis karon nga nasinati sa tibuok kalibutan.
Gipasabot sa Dole nga dili angay mabalaka ang mga empleyado gumikan modiretso na sa matag trabahante ang salapi pinaagi sa cellphone number nga gibutang sa ilang pangalan diin di na kini moagi pa sa mga employer.
Pinaagi sa cellphone number, didto i-text sa Dole ang reference number sa remittance center aron diretso na kining makuha sa empleyado.
Apan gipasabot sa Dole nga ipailawom pa sa beripikasyon ug pag-apruba ang aplikasyon nga gisumite sa mga employer ngadto sa ilang buhatan, ug mo-email karon ang Dole kung kini aprubado ba.
Gipasalig sa Dole nga layo ra ang usa ka semana o duha ka semana diha sa pag-apruba gikan sa pagsumite sa mga aplikasyon.
Niining mao nga pamaagi, kinahanglan di magluya-luya ang mga Human Resources (HR) sa matag buhatan, [kining mga employer]. Kinahanglan paspas ang paglihok sa HR department aron mapadali ang pag-sumite sa Dole, gumikan nanginahanglan gayod og salapi ang tanang empleyado ning panahona.
Sa paspas nga lihok sa HR department sa mga employers, paspas sab nga maalibyohan ang kaguol sa katawhan gumikan mahupay kini kay makapalit naman og mga pagkaon ug nag-unang panginahanglanon diha sa pamilya, busa HR, paspasan nato ang lihok.