Moulic mihari sa online chess

ANG taga-Davao City nga si Alfred Moulic, maoy kampeyon sa Davao Region Beating C19 Online Tournament, nga Beating the Covid-19 Attack Grand Prix Series ning bag-o lang.

Si Moulic nga gagamit sa username Brendarita77, mitally og 28 puntos sa kompetisyon nga gimugna ni Atty. Jong Guevarra Jr. sa Toril, Davao City.

Gipildi niya ang laing Dabawenyos Eric Fernandez (fernz_eric) ug Sherwin Orbeta (kingsherwin) nga nabutang sa ikaduha ug ikatulong pwesto.

Si Fernandez mikamada og 22 samtang si Orbeta mihimo og 20 puntos.

Ang top three placers midawat og mobile loads nga P100, P60 ug P40.

Si Moulic, nga gikan sa Buhangin ug amahan sa De La Salle University chess varsity scholar Ella Grace, mipildi nila Jim Briken Diabakid (diabakid), Sherwin Orbeta (kingsherwin), Reynaldo Gempero (sanovsky), Joeawi Dimaampao (joeawi), Renard Mamaril (Renard19), Lyndon Sombilon (lucasliam), Nofre Reyes (Reyesshevsky) ug Sombilon.

Si Moulic, sa Facebook interview sa SunStar Davao nagsulti nga mas gipili niya ang pagduwa online inay ang face-to-face.

“Different, walay kaba," suma niya.

Dugang niya nga ang hagit lamang sa pakigtigi sa online games mao ang hinay nga internet connection nga makaapekto sa tsansa sa magduduwa nga modaug.

Apan ni Moulic, “Pero much better ni, walay engagement sa mismong kalaban nimo, to avoid Covid-19."

Samtang si Guevarra nagkanayon nga gimugna niya ang online tournament via lichess.org ug bukas kini sa tanang Mindanao chessers.

“Series ni siya meaning six tourneys naa siyay corresponding points per tourney then at the end of the 6 tourneys the top 3 scores will be declared winners," sigon ni Guevarra.