BALIK ta sa bibliya karon, kini ang atong talamdan ang mga panagna sa mga Propeta nga natuman diha sa bag-ong kasugoan, ug ang gipanulti sa atong Ginoong JesuKristo nga natuman karong panahona.
Sa basahon ni Propeta Jeremias kapitulo 6: 19: Pamati kamo, o tibuok kalibutan, padad-an kog katalagman kining maong katawhan nga maoy angay gayud kanila, wala sila magpatalinghog sa akong mga pulong ug ilang gisalikway ang gitudlo ko kanila.
Sa Mateo 24: 6 ngadto sa 8: makabati kamo'g kagahob sa mga gubat sa duol ninyo, ug mga balita sa gubat sa halayo ninyo, apan ayaw kamog kabalaka, kay kining mga butanga, kinahanglan mahitabo apan wa kini magpasabot nga mao na ang katapusan. Ang buot ipasabot dinhi sinugdanan na kini alang sa umaabot nga katapusan.
Mga magbabasa niining maong lindog, kon inyong namatikdan bisan ang mga magtutudlo sa Ebanghelyo sa atong Ginoo, mga Pastor, kuwarta na ang gipaka-Diyos sila ang nangulo sa mga 'scammer' sa Davao del Norte ug gipaluyohan sa mga politiko, aron lang mabutang sa gahum; duna sa’y mga Pastor nga sa dihang pobre pa, wa magpa-ila nga tinudlo siya sa Diyos, apan, sa dihang nadato na ginamit ang pangalan sa Diyos tinudlo na daw siya.
Ingon na ini kahugaw ang atong kalibutan, nga unta gibuhat kini sa atong Ginoong Diyos para atong puy-anan ug panginabuhian, daghan kanato nga ultimo tukoran og balay nga atong kapuy-an wala, kay gipanag-iya sa pipila lang.
Gusto tang mag-ugmad sa yuta para kita mabuhi apan walay yuta nga tikarunon kay giduphan sa mga adunahan o mga Oligarte. Mga pipila ka mga relihiyon nga gigamit ang pangalan sa atong Diyos alang sa ilang pagpakaadunahan.
Mao nani ang katumanan sa gisulti sa atong Ginoong JesuKristo “Unsay kapuslanan sa usa ka tawo nga maangkon niya ang tibuok kalibutan apan ang iyang kalag malaglag ngadto sa Impyerno”.
Sinugdanan palang kini sa kagutom, ilabina karon nga kuwang ug di bastante ang suporta sa atong gobyerno ngadto sa atong mga mag-uuma, nagsalig kita sa rice importation; karon kung hunungon sa Vietnam ug Thailand ang ilang pagbaligya og bugas sa atong nasud? Dili ta mamatay Covid-19 kon di mamatay ta’s gutom.
Kay ang atong halapad nga kayutaan, gipangtamnan man nato og pang-export nga produkto, ug gihimong mga subdivision. Pero wa na kita'y mahimo kung kini sinugdanan na sa katumanan sa mga panagna diha sa atong balaan nga kasulatan.
Magpaabot nalang kita sa hukom sa atong balaang Diyos, hinaut unta nga magkahiusa ta sa pag-ampo nga wagtangon na niya kining kagaw nga mipatay na og daghang kinabuhi sa tawo. Pero Kaniya pa gihapon ang matuman, o gamhanan nga Diyos ug dili ang kabubut-on sa tawo.