UNANG mahatagan sa mga relief goods ang mga nawad-an og panginabuhian, mga negosyanteng nasirado gumikan sa gipatumang community quarantine ug mga tawo nga labing naapektuhan ning krisis nga dala sa coronavirus disease (Covid-19).
Kini ang gibutyag ni Davao de Oro Governor Jayvee Tyron Uy, atol sa iyang Facebook Live alas 7 sa gabii, niadtong Marso 28, diin gibutyag niini nga nahiabot na ang mga relief goods nga gipadala ni Davao City Mayor Sara Duterte-Carpio alang sa onse ka mga lungsod ning probinsya isip ayuda sa krisis nga nasinati sa kadaghanan gumikan sa Covid-19 pandemic.
Lakip usab sa mga maunang hatagan og ayuda ang mga drayber sa singgol nga motorsiklo, drayber og pedicab ug mga drayber sa traysikad.
Sumala pa nga aduna na’y pipila ka mga lungsod ning probinsiya sama sa lungsod sa Nabunturan nga nahatag na ang maong mga ayuda apan, aduna pa’y ubang lungsod nga padayon pa sa pag-repack o pagbahin-bahin sa maong mga relief goods hinungdan nga wa pa matunol ngadto sa katawhan.
Dili man madungan paghatag ngadto sa mga tawo ang maong mga ayudang giandam sa gobyerno apan, gipaneguro ni Gov. Uy nga aduna pa’y laing muabot ug ilang gipaningkamutan nga ang tanan mahatagan sanglit alang kaniya ning kasamtangang krisis nga gisagubang, ang tanan nanginahanglan og tabang sa usa’g usa. (DTV)