GIBALHOG sa prisohan ang usa ka hubog nga matud pa nagyaga-yaga dihang miagi sa gimuntar nga checkpoint sa Brgy. Mapawa lungsod sa Maragusan, Davao de Oro.
Ang pangalan sa dinakpan gipatago, kinsa gi-alyasan kini og Tansiong, hamtong ang pangedaron, ug molupyo sa Brgy. Araibo, lungsod sa Pantukan.
Subay sa Facebook page nga gi-post sa LGU-Maragusan, alas kuwatro sa hapon dihang miagi sa gimuntar nga checkpoint ang suspetsado, kinsa lango sa ilimnong makahubog.
Giingon nga dihang gipangitaan sa siya sa iyang quarantine pass, mi-smile lamang kini ug misulti nga iyahang kuoton sa iyang itlog kay iya kining gipaipitan og maayo aron di mawala.
Sa walay pagduha-duha kining gidakop sa mga pulis nga nagpahigayon og checkpoint ug sa prisohan kini nakatulog ug nahuwasan sa iyang kahubog diin siya nagmahay sa gihimong pagyaga-yaga sa awtoridad.
Hinuon, gisulti ni P/Ssg. Dave Dayupay sa Maragusan Municipal Police Station nga gibuhian nila ang suspetsado human nga nangayo og pasaylo sa iyang gihimo ug misaad nga di na kini mousab. (DTV)