NASUBO nga nagpatala sa kapulisan sa Sta. Ana Police Station ang usa ka babaye kinsa miangkon nga di siya legal wife human sila nag-away sa iyang giingong kabit kay dili na siya pa-angkason sa iyang giutang nga motorsiklo.
Alas 3 sa hapon niadtog Huwebes nagpatala sa Sta. Ana PNP ang usa ka Shiela, (bansagon gitago), 23-anyos, usa ka call center agent ug temporaryo nga nagpuyo sa Brgy. 22-C, Piapi Boulevard, Davao City.
Giingon nga kasabot man kuno siya sa balaud karon nga gipatuman sa kapulisan sa Davao nga bawal ang 'back-ride' aron mapabilin ang social distancing sa paglikay sa Covid-19 apan istoryahan unta siya og pinabugnaw sa iyang kabit, dili ipaagi sa kainit sa ulo.
Sumala ni Shiela nga sakit alang sa iyang bahin nga kasab-an ug daw sumbagon na sa iyang kabit, gumikan gipulawan niya sa call center ang mga oras sa gabii aron makabayad sa inutang nga motorsiklo.
Didto sab sa Davao de Oro, usa ka misis ang nasubo dihang dili na kini maka-angkas sa iyang bana kung mosunod ang Davao de Oro nga mopatuman sa 'no back-ride' nga gipatuman na sa Davao City.
Si Marlyn, 33-anyos nga trabahante sa sagingan nga sumala pa, di muoyon nga ipatuman ang maong polisiya sa probinsya sanglit, daghan silang mga asawa nga nanarbaho ang nagapahatod-sundo sa ilang bana.
Gikabalak-an sab ni Marlyn nga sa higayon nga mapatuman na kini nga balaud sa DavOro, mawad-an og pangita ang iyang mister ug di na usab kini makahatud-sundo kaniya.
Dugang gikaguol ni Marlyn nga nagpasiaw nga misaysay sa SuperBalita, nga usahay kung masabutan nila sa iyang bana, moliko sila sa kasagbutan ug didto sila mopa-uraray sa ilang lawasnong panginahanglan isip mag-asawa kay naa ilang mga anak sa balay, apan di na nila kini mahimo.
Hinuon, sa Facebook Live sa gobernador ning probinsiya, Governor Jayvee Tyron Uy iyang gibutyag nga gikinahanglan pa ang konsultasyon labi na sa katawhan sa Davao Oro una sundugon ang maong polisiya sa siyudad sa Davao sanglit, nakita niini ug nabati ang mga sentiyemento sa katawhan nga maapektahan sa higayon nga ipa-implementar kini sa ilang dapit.