NAGPAGAWAS og laing executive order si Mayor Oscar Moreno kalabot na sa pagpasirado sa pampublikong mga kamerkadohan lakip na talipapa sa mga Barangay gikan alas 7:00 sa gabii hangtod alas 5:00 sa buntag sa siyudad sa Cagayan de Oro.
Kini naglangkob sa merkado sa Bulua, Carmen, Puerto ug sa Cogon, Agora ug tanang merkado sa mga barangay sugod karong Marso 30 adlaw nga Lunes.
"Atong merkado and I'm referring not only to Carmen, Cogon, West Bound and Puerto but also Agora and all the market including the Barangay markets," matud ni Moreno.
Nasayod kini nga importante kaayo ang kamerkadohan gani planong ilusad ang mobile market apan buot niini nga makaamgo ang katawhan nga dili angayang magdugay sa mga merkado ug dili magtambay.
Gidugang pa nga kinahanglan lang nga ang moadto sa merkado kadto lang adunay importante nga tuyo.
Giingong ang pagsira sa kamerkadohan sugdan dayon ang disinfection aron usab nga mahuman kini ug makauli na ang mga mag-disinfect sa dili pa ang curfew sa alas 9:00 sa gabii.
"Pagsara magsugod dayon ang atong disinfection to be undertaken by city hall employees and atong mga kauban, disinfection simultaneous sa atong kamerkadohan," matud ni Moreno.
Giingong giduso kini ni Konsehal Ian Mark Nacaya, overseer ug tsirman sa City Economic Enterprise Department (CEED).
Nanghinaot si Moreno nga mo-abag ang tanan tungod kay alang kini sa kaayohan sa katawhan.
Gibutyag usab niini nga importante kaayo ang mga gapamaligya sa maong dapit gani aron ma-ingganyo wala una naningil ang siyudad sa ilang renta diha sa merkado.