WALAY community lockdown nga gipatuman ang dakbayan sa Cagayan de Oro atol sa press conference nga gipahigayon niadtong Sabado, Marso 14 sa Mayor's office dinhi sa siyudad.
Kini bisan sa kabalaka sa katawhan human namatay ang usa ka pasyente sa Covid-19 nga si Ph40 nga anaa sa Northen Mindanao Medical Center (NMMC) niadtong Marso 13 sa gabii.
Kini ang pinakaunang namatay gawas sa Manila ug ika-unom nga ihap sa namatay sa Covid-19 sa nasud.
Gibutyag ni Mayor Oscar Moreno nga dili usab mahimo nga mag-lock down ang dakbayan sa Cagayan de Oro.
"Wala ta'y community lockdown or community quarantine, di man nato pwedi ingnon ang taga Iligan nga ayaw sa mo og sulod dinhi, di nato pwedi ingnon ang taga Laguindingan nga ayaw sa mo og sulod," matud ni Moreno.
Giingon niini ang importante mao ang contact tracing ug kooperasiyon labi na sa mga niadtong duol sa nagpositibo sa maong virus.
"Mao na importante ang contact tracing para ma pinpoint ang possible connections nga mag self quarantine," dugang pa.
Gidugang usab ni Moreno nga kinahanglan lang karong panahona mao ang pagtinabangay.