BISAN mingaw na ang kadalanan, si Land Transportation Office (LTO) 7 director Victor Caindec nagkanayon nga makanunayon ang operasyon sa upat ka teams sa strategic locations sa Sugbo aron manakop.
Kon hawan ang dalan ug aduna’y mopakusog nga wala masubay sa speed limit, kini dakpon sa LTO 7.
Dugang ni Caindec nga kining Reckless Driving uso kini kon hawan ang dalan.
Usa usab sa pagasutaon sa LTO 7 kining mga trucks nga magdeliver sa goods, kinahanglan nga dili ni maglumbaanay tungod sa kamingaw sa dalan.
Kini usab mga mag-motor nga wala’y helmet, panakpon usab kini sa LTO 7.
Dili usab pagkampante ang mga nanag-iya og sakyanan mga wala’y rehistro tungod kay dakpon nila kining wala’y rehistro nga hawd nakapadagan sa atoang kadalanan.
Matod ni Caindec nga random ang inspection nga himuon sa LTO 7.
Gipahibawo usab sa direktor nga shutdown ang ilahang buhatan sa N. Bacalso Avenue tungod kay duol kini sa tambalanan ug aron usab malikayan sa ilahang kawani ang mataptan og sakit.
Samtang ang Land Transportation Franchising and Regulatory Board (LTFRB) 7 nagsige usab og panawat og mga special permits.
Matod ni LTFRB 7 regional director Eduardo Montealto Jr., nga sagad sa ilahang madawat nga requests pinaagi nalang sa email aron malikayan ang pagkatap sa Covid-19.
Kining mga bus nga gipanguha sa nagkadaiyang local government units, ilaha kining gisuta kon aduna’y prangkisa ang operator or wala.
Dugang ni Montealto nga kon wala nagbayad ang LGU sa operator, libre usab ug wala’y bayad ang special permit nga P170 matag unit sulod sa tulo ka adlaw.
Apan kon nagbayad ang nikuha niini susama sa usa ka kompaniya sa dakbayan sa Mandaue, aduna na kini’y bayad matag unit.
Padayon nga mag-monitor ang duha ka ahensiya sa kaluwasan sa kadalanan bisan paman nga mingaw ang dalan. (HBL)