USA ka lalake ang napalgang patay sa bukirang Sityo Cantipla 1, Barangay Budlaan, siyudad sa Sugbo kagahapon, Marso 30, pasado alas 4 sa hapon.
Si PSsgt.Roy Bacus sa Mabolo Police Station-4 nga nahinabi sa Superbalita Cebu miila sa biktima nga si Jaime Baruca, 47,ug molupyo sa Barangay Kalunasan, siyudad sa Sugbo human giila sa inahan sa biktima nga si Aresita Yosores.
Matud ni Bacus nga usa ka Joselito Alindahaw Lupon sa maong barangay niasoy nga samtang nag lakaw kini kuyog ang asawa, nabantayan niini ang lalake nga nagkulob tungod sa kahoy sa dulhogon nga dalan.
Sa pagsusi sa miresponde nga mga pulis sa dapit, ang maong tawo nasuta nga gibaatan ang liog og alambre ug nabulit sa mga samad dinunggaban ang biktima sa pipila ka mga parte sa iyang kalawasan.
Narekober sa crime scene ang kolor nga itom nga facemask,bonet ug ang alambre nga maoy nakahikot sa liog sa biktima.
Samtang, ang mabolo police walay laing gilantaw karon nga anggulo ang posibleng personal grudge ngadto na motibo sa pag patay sa biktima.
Ang inahan sa biktima nga nakahinabi sa Superbalita Cebu miingon nga pinaagi sa post sa Superbalita website nakahibalo sila kalabot na sa paglabay sa iyang anak didto sa Tabunan.
Giingong niadtong Biyernes, Marso 27, sayo sa buntag dunay sakyanan nga pula ang kolor nga maoy midakop sa iyang anak nga niadtong tungora nagdrayb og habalhabal.
"Amo nana siyang gipa blotter niadtong Sabado kay nabalaka naman ko kon asa na siya kay ako nang gilibot ang tanang mga stasyon sa pulis wala man gyud," matod sa inahan.
Dugang sa inahan nga drayber sa habalhabal ang iyang anak apan diha sa Cebu City Jail ginasugosa warden sa Cebu City Jail ug ginasuholan.
Naduda ang inahan nga sinahan ang iyang anak o na alaan lang human nga dunay usa ka higayon nga nasakyan og drug lord ang iyang anak subay sa pamahayag sa mga kauban nga habal habal sa iyang anak.
Hustisya ang gipangayo niini kon kinsa man gali ang nag buhat sa pagpatay sa iyang anak mailhan unta. (BBT)