GIPAHIBAWO ni Lapu-Lapu City Mayor Junard Chan nga ang Siyudad mang apod-apod og tagsa ka sakong bugas matag pamilya.
Apan dili bulto ang paghatag niini kon di, ipaagi og kinilo ug by batches.
Bahinon kini sa tag lima ngadto sa 10 ka kilong bugas ang madawat sa matag panimalay, depende unya sa availability sa bugas hangtod nga maabot na og 50 ka kilo ang madawat sa usa ka pamilya.
Giklaro hinuon ni Chan nga prayoridad sa ilang hatagan mao ang mga kabus ug walay ikasarang ingon man ang mga nawagtangan og trabaho gumikan sa coronavirus disease (Covid-19).
Kini naglakip sa trisikad driver, boatmen, hotel personnel, ug trabahante sa beauty parlor ug massage spa.
Ang City Social Welfare and Development Office (CSWDO) nang apod-apod na og sugod sa bugas, de lata, noodles, gatas ug kape dihang nagsingabot pa ang pagpatuman sa enhanced community quarantine (ECQ) sa alas 12:01 sa tungang gabii, Marso 29.
Si Chan nagkanayon nga inisyal na nilang nahatag ang lima kilong bugas ug groceries sa tanang pamilya sa 14 ka barangay sa isla sa Olango. “In fact we are on our second wave of giving food packs to Olango island residents,” matod ni Chan.
Ang unang hugna gihatag niadto pang naapektohan ang turismo sa dakbayan gumikan sa hulga sa Covid-19 nga miresulta sa pagkanselar sa mga flight ug pagmenos sa turista sa dakbayan.
Giingong moabot sa 8,000 ka mga trabahante nga nagsalig sa turismo ang nakadawat sa naasoyng pasiunang hinabang.
Ang dakbayan nakadawat og inisyal nga 10,000 ka sakong bugas nga maoy gibahin-bahin og tag lima ka kilo sa matag pamilya.
Sa kinatubuk-an, moabot sa 10,000 ka mga pamilya ang nakadawat niini. Ang dakbayan adunay moabot sa 408,112 nga residente, sumala sa 2015 census.
“Mo-continue gyud ang atong pagpanghatag ug mangita ‘ta og laing pondo aron masustinir nato ni,” matod ni Chan.
Karong semanaha gikatakdang makadawat ang kagamhanan og laing supply sa bugas nga mahimong mabahin ngadto sa 10 ka kilo matag pamilya.
Human sa isla sa Olango, ang kabarangayan na usab sa mainland maoy gisugdan pagpang apod-apod sugod sa Lunes, Marso 30.
Gitataw sa mayor nga bisan walay pampublikong transportasyon nga tugotan sa pagpaubos sa dakbayan sa ECQ , ang kagamhanan motagana og mga modern jeep sa matag barangay.
Samtang ang biyahe sa isla sa Olango magpadayon.
Giawhag ang mga barangay sa paggamit sa ilang calamity funds atol sa ECQ sanglit ang hinabang sa kagamhanan maisip lamang nga backup sa panginahanglanon sa mga Oponganon. (GCM)