GIPASAKAAN nag kaso ngadto sa Cebu City Prosecutor’s Office ang abogado nga nag post sa iyang Facebook account sa mga ngalan ug mga address sa mga tawo nga giingong nagpositibo sa coronavirus disease (COVID-19).
Ang nadakpan sa mga sakop sa Regional Intelligence Division sa Police Regional Office 7 niadtong Biyernes, Marso 27, 2020, mao si manlalaban Rommel Rosito, 50, taga Fairview Hills, Sabellano street, Barangay Basak Pardo, Siyudad sa Sugbo.
Mga kasong kalapasan sa Republic Act 10175 kun Cyber-Crime Prevention Act ug RA 10173 kun Data Privacy Act ang gisang-at sa kapulisan, inabagan sa Department of Health (DOH) 7.
Matod ni Police Regional Office (PRO) 7 chief Police Brigadier General Albert Ignatius Ferro nga sigun sa balaod, ang bugtong makahatag lang sa impormasyon labot sa mga nataptan sa makamatay nga sakit mao ang DOH, local government unit ug kapulisan.
Gawas niining mao nga mga ahensya, wa nay lain pa, ug dakpon ang bisan kinsa nga mag post sa social media nga di gikan sa gitugotan sa balaod.
“Ngano man nga dili nato sila papayagan? Because we have the chain of information dissemination channel. Ang atong department of health, ang atong local government and ang inyung kapulisan will be the channel for information dissemination,” matod ni Ferro sa mga tigbalita.
Una nang nibutyag si Rosito nga wa siyay gibasolan sa iyang pag post sa mga ngalan sa mga nag posito sa Covid 19 kay iyang tumong aron mahibawo ang publiko ug malikay sila sa makamatay nga virus.
Apan subling mipasabot ang heneral nga di mahimong ang tanang tawo maoy mobutyag niini sa publiko. “Yeah, (it’s) his opinion. But, you know we have to follow the rule of law wherein we have to give credit to the people that are allowed to inform the general public, not the individual person,” dugang ni Ferro.
Dako usab nga kalapasan sa katungod sa mga tawo nga ginganlan sa abogado nga wa gani pangayoi sa pagtugot nga ma publikar sila. Dugang niya nga bisan pag tinuod ang mga impormasyon nga nakuha ni bisan kinsa nga indibidwal, wa siyay katungod nga mag pahibawo niini sa social media nga walay pagtugot sa DOH nga maoy ahensya nga dunay katungod nga mohimo niini. (AYB)