ANG mga mayor sa tulo ka mga dakbayan sa Metro Cebu nagkasabot kinsa ang makasulod ug gawas sa ilang mga border.
Apan si Gobernador Gwendolyn Garcia niingon nga ang iyang Executive Order (EO) ang matuman, dili ang mga EO ug memorandum nilang Cebu City Mayor Edgardo Labella, Mandaue City Mayor Jonas Cortes ug Lapu-Lapu City Mayor Junard “Ahong” Chan.
Kining panagsungi sa ilang mga EO wa pa maresolbar.
Sila si Labella, Cortes ug Chan nagkauyon nga ang mga tawo nga exempted sa EO sa Kapitolyo, nga wa malakip sa mga medical ug emergency worker, makasud gawas ra gihapon sa mga utlanan sa Mandaue City ug Cebu City.
Apan si Garcia niinsiter nga ang medical, emergency personnel ug kadtong nanginahanglan og medical nga atensyon lang ang makasud gawas sa mga utlanan sa duha ka mga siyudad base sa Section 15 sa iyang EO.
Ang Section 15 sa EO ni Garcia naglatid nga ang medical, emergency ug security personnel ingon man mga accredited nga media personality ang makasud gawas sa mga utlanan sa Cebu City ug iyang mga silingang lokalidad.
Sila si Labella, Cortes ug Chan pulos niisyu og memorandum ngadto sa ilang tagsa-tagsa ka city director sa pulis nga giulohan og "reciprocity agreement"
Si Labella niisyu og memo ngadto kang Police Colonel Hector Grijaldo nga pasudlon sa mga border sa dakbayan ang mga molupyo sa Mandaue ug Lapu-Lapu kinsa nagtrabaho sa Cebu City ug vice-versa.
"Please be informed that per discussion with the Mandaue City , Lapu-Lapu City ang in consonance with the relative issuances of the Inter-Agency Task Force for the management of emerging infectious disease , the following exempted personnel under EO 67 should be granted entry in the City of Cebu without the need of ECQ Passes but subject to the presentation of appropriate identification documents," matod sa memo ni Labella.
Si Cortes usab nihimo og memo para ngadto kang Police Colonel Jonathan Abella, pangulo sa Mandaue City Police Office.
"In this end, it is requested that our personnel manning our checkpoints in the City be appraised of the EO of both in Cebu City and Lapu-Lapu City in order for the exempted personnel as well as essential goods and cargoes as stipulated in their respective EO be granted entry into the City of Mandaue without the need of any passes," padayag ni Cortes.
Samtang si Chan niisyu sab og susamang memo ngadto ni Police Colonel Clarito Baja sa Lapu-Lapu City Police Office.
Exempted
Lakip sa mga exempted mao ang provincial governor, vice governor ug board members.
Justices sa Supreme Court, Court of Appeals, Court of Tax Appeal, Sandiganbayan, Ombudsman ug Deputy Ombudsman.Ang tanang kongresista sa Cebu, judges, skeletal workforce sa mga korte, regional ug provincial directors sa lainlaing agency, local government officials.
Diplonatic corps sama sa consul, ambassador, empleyado sa Kapitolyo, empleyado sa component cities sa Province of Cebu.
Prosecutors ug skeletal workforce sa ilang opisina, opisyal sa DOF ug staff, private ug government doctors, nurses ug ubang medical personnel.
Hospital workers, hospital staff ug janitors, member sa Philippine National Red Cross nga adunay official function, media accredited sa Kapitolyo, Mandaue ug Lapu-Lapu, member sa PNP, AFP ug security personnel, field personnel.sa VECO, MCWD, PLDT, Globe, Smart, Sun ug ubang Telcos.
Tanang trabaho may labot sa energy apil ang mga technician, kawani ug opisyal sa banko, money transfer.
Delivery personnel sa mga cargo ug ubang essential goods nga adunay karga o wala.
Tawo nga gustong magpatambal uban sa certificate sa ilang mga mayor ug gitugotan nga aduna lay usa ka kuyog.
Apan ubos sa Section 15 sa Executive Order no. 5-0 ni Garcia, ang iya rang gitugtan mao ang emergency ug medical personnel, administrative staff sa mga tambalanan, kapulisan, kasundaluhan, kabomberuhan ug emergency rescue personnel ingon man accredited nga media personalities.
Matod ni Garcia nga kon wa malakip niini, di mahimong makasulod sa lalawigan.
Mahimo silang makasud sa Siyudad sa Sugbo, apan di na makabalik, hinungdan nga ang mga business process outsourcing ug kadtong ubang exempted sa EO iyang giawhag sa pagbutang og temporaryong kapuy-an sa ilang mga staff.
Kabahin sa Dakbayan sa Mandaue, si Garcia niingon nga ubos pa kini sa hurisdiksyon sa Kapitolyo. Ang mga Siyudad sa Sugbo ug Lapu-Lapu di na ubos sa Lalawigan kay kini mga highly urbanized city.
Nagubot
Sa unang adlaw sa ECQ, mga lumulupyo nagdasok gawas sa Mandaue City Hall aron mangayo og border ug vehicle passes aron makalabang sa mga kasikbit nga dakbayan sa Mandaue aron motrabaho.
Sa pakighinabi sa Superbalita Cebu ngadto kang Police Col. Jonathan Abella, giklaro nila udto sa Lunes, Marso 30, 2020, nga di na kinahanglan pa nga mangayo og vehicle og border pass ang mga trabahante.
Ipakita lang nila ang ilang company identification (ID) card ug work certification o certification of employment sa mga checkpoint.
Gani sa ubang barangay sa Mandaue, adunay mga lumolupyo nga niingon sa Superbalita Cebu nga gipangayoan sila og bayad sa ilang certification sa barangay aron makagawas sila aron motrabaho.
Apan giklaro kini ni Atty. John Eddu Ibañez,executive secretary ni Cortes, nga ang certification sa barangay adunay bayad. (PAC, KFD, ANV, BBT)