Kalangan sa relief assistance magdepende sa lider

GIPASABOT sa Department of Social Welfare and Development (DSWD)-Northern Mindanao nga kung aduna man pagkalangan sa pagpagawas sa relief assistance, anaa na kini sa local chief executive nga gisakupan sa City Social Welfare Development Office (CSWDO) ug Municipal Social Welfare and Development Office (MSWDO).

Kini ang gibutyag ni Evelyn Madrio personahe sa DSWD-Northern Mindanao nga mitambong ubos ni Regional Director Mari Flor Libang atol sa Northmin Task Force for Covid-19.

Gipasabot niini nga walay gahom ang DSWD nga momandar sa CSWD ug MSWD nga paspasan nila ang ilang pagpagawas sa relief assistance.

"Sa structure karon, ang MSWDO ug CSWDO under sila sa supervision sa ilang tagsa-tagsa ka nga mga local chief executive, so wala mi power nga momandar sa ilaha nga mopaspas, so depende na sa ilang head sa agency," tubag ni Madrio sa pangutana nga mahimo ba nilang madirektahan ang matag buhatan aron mahatag na ug di madugay ang relief assistance nga gipaabot sa katawhan aron kini sila makapuyo sa ilang balay ug dili na mogawas ning gilikayan ang paglakawlakaw usa sa pakigbatok sa Covid-19.