GIPAHIBALO ni Dr. Adriano Suba-an, ang regional director sa Department of Health (DOH)-Northern Mindanao, nga 17 ka PUIs (patients under investigation) sa Northern Mindanao ang nagnegatibo sa bag-ong resulta nga test sa coronavirus disease (Covid-19).
Ang resulta sa testing naggikan sa Research Institute for Tropical Medicine (RITM) sa Muntinlupa, Manila ug Southern Philippines Medical Center (SMPC) sa Davao niadtong Marso 29 nga gipahibalo Lunes, Marso 30, ni Suba-an atol sa Northmin Task force for Covid-19 press conference.
Sa maong ihap, lima sa Misamis Oriental, usa sa Misamis Occidental, upat sa Lanao del Norte, upat sa Lanao del Sur, duha sa Cagayan de Oro, ug usa sa Bukidnon.
Ang tulo ka mga PUIs kinsa unang gi-test nga positibo ang karon nag negatibo na ang resulta.
"Three of the PUIs used to be a Covid positive in their first test are now negative it means that they are currently recovering," matud ni Suba-an.
Sa kinatibuk-an nga datos, adunay moabot 283 ka mga PUIs sa rehiyon kon diin 36 niini ang kasamtangan nga giadmit ug 40 na ang nagnegatibo ug na-discharged samtang 107 niini ang anaa ubos sa home quarantine ug 93 ang nakakumpleto sa quarantine period ug gideklarar nga cleared.
Mokabat sab sa 4,323 ka mga persons under monitoring ang rehiyon diin 806 niini kasamtangan nga gipaubos og 14 ka adlaw nga kwarantinas.
Moabot sab sa 3,427 ang nakakumpleto sa quarantine period.
Matud ni Suba-an nga naningkamot karon ang rehiyon nga dili na madugangan ang ihap sa mataptan sa rehiyon.
"Maayo ang atong performance kay wala nisaka ang kaso," matud niini ug mihangyo sa katawhan nga magtinabangay ug kung mahimo magpuyo sa balay tungod kay kini ang usa sa bugtong makatabang nga dili na mokatap ang virus ug dili na motakod.
"We just have to stay calm and be vigilant. Nagtinabangay nata karon sa mga health regional we are in constant communication atong ipaabot sa ilaha nga magtinabangay and we are provided to come up with a plan," matud ni Suba-an.